Një ngjarje e rëndë është regjistruar në qytetin e Durrësit, ku një 15-vjeçar është marrë peng nga katër persona dhe është dhunuar barbarisht me përforcues grushti dhe shkop dreuri prej tyre. Si rezultat, Policia e Durrësit ka arrestuar dy prej autorëve dhe dy të tjerë i ka proceduar penalisht.
Më konkretisht në kuadër të operacionit policor të koduar “Case”, janë arrestuar shtetasit Denis Sina, 21 vjeç dhe D. Xh., 16 vjeç, si dhe janë referuan materialet në Prokurori ku nisi procedimi në gjendje të lirë për shtetasit K. S., 25 vjeç dhe E. S., 16 vjeç, banues në Durrës.
“Nga veprimet hetimore dyshohet se pasditen e djeshme, në lagjen nr. 13, Durrës, shtetasit Denis Sina, D. Xh., K. S. dhe E. S., kanë marrë me forcë, në automjet, 15-vjeçarin, dhe e kanë goditur me sende të forta, për motive të dobëta.” – thuhet në njoftimin e Policisë.
Në cilësinë e provës materiale, Policia ka sekuestruar automjetin tip “Fiat” i përdorur për këtë rast, një përforcues grushti dhe një shkop druri.
Materialet procedurale i kaluan Prokurorisë së Durrësit për veprime të mëtejshme.
