Policia e Korçës në bashkëpunim me homologët e Athinës, si dhe mes prokurorive respektive kanë identifikuar dhe arrestuar dy autorët e tjerë të vrasjes së 25-vjeçarit shqiptar Arjan Xhambazi, ngjarje kjo e ndodhur më 6 Dhjetor të vitit 2008 në Athinë të Greqisë.
Në atë ngjarje mbeti i plagosur dhe një person tjetër, teksa në atë kohë policia greke arriti të arrestonte vetëm një prej 3 autorë. Prokuroria rihapi hetimet dhe së fundmi janë arrestuar dhe dy autorët e tjerë.
Policia e Korçës ka arrestuar shtetasit Gëzim Latja, 41 vjeç, banues në Elbasan dhe shtetasin Armando Tarushllari alias Jetnor Cinellari, 52 vjeç, banues në Tiranë, për të cilët Prokuroria kishte nxjerrë urdhër ndalimi. Ata akuzohen për veprën penale “Vrasja me dashje”, kryer në bashkëpunim.
Blutë e qytetit juglindor bëjnë me dije se vijojnë hetimet e përbashkëta me autoritetet greke në lidhje me dokumentimin e plotë të ngjarjes dhe ekstradimin e tyre drejt shtetit grek.
Materialet procedurale i kaluan Prokurorisë së Korçës.
