Nga Boldnews.al
Këshilli i Lartë Gjyqësor, nëpërmjet një takimi, ku prezantoi një Strategji jo shumë premtuese për uljen e stokut të dosjeve në gjyqësor, ka dhënë një dorë në shtyrjen e plot proceseve gjyqësore.
Në aktivitetin e zhvilluar këtë të Hënë, me temë “Prezantia e Strategjisë për uljen e dosjeve të prapambetura”, ishin të ftuar dhjetra gjyqtarë nga qytete të ndryshme të Shqipërisë, të cilëve u duhet të shtynin proceset gjyqësore për të dëgjuar disa “fjalë në erë”.
Po ju sjellim një rast konkret në morinë e situatave të ngjashme. Gjykata Administrative e Shkallës së Parë, Lushnje, njoftoi këtë të hënë se janë “anuluar seancat gjyqësore të datës 20 maj 2024 me trup gjykues Hazbi Balliu”.
Sipas njoftimit të administratës së gjykatës, këto seanca (nuk dihet numri i tyre), do të shtyhen “për shkak se gjyqtari Hazbi Balliu është pjesëmarrës në aktivitetin e KLGJ-së për prezantimin e Strategjisë së Uljes së Stokut të dosjeve të prapambetura”.
Pra, gjyqtari Balliu, ashtu si edhe shumë kolegë të tij, do të dëgjonin strategjinë e KLGJ-së për uljen e stokut, por ndërkohë që, me pjesëmarrjen e tyre në atë aktivitet farfuritës, po kontribuonin në rritjen e stokut.
Nga ana tjetër, gjyqtari Hazbi Balliu ka pasur një arsye të dyfishtë për t’i lënë qytetarët jashtë derës së tij.
Në njoftimin e administratës gjyqësore thuhet gjithashtu se seancat e gjyqtarit Hazbi Balliu u shtynë, pasi ai ka një çështje të tijën në Gjykatën e Apelit Administrativ në Tiranë dhe data e gjyqit të kësaj çështjeje personale i ishte njoftuar pasi ai kishte caktuar seancat për qytetarët për në datën 20 Maj 2024.
Për këtë arsye, gjyqtari Hazbi Balliu la pa zhvilluar seancat në Lushnje, pasi do të dëgjonte Strategjinë e KLGJ-së dhe do të ndiqte seancën e tij gjyqësore në Tiranë.
Për të kuptuar më konkretisht pasojat e “shtyrjes rutinore” të proceseve gjyqësore, mjafton të shihen statistikat e Këshillit të Lartë Gjyqësor për ngarkesën e punës dhe efektivitetin e gjyqtarëve në Gjykatën Administrative të Lushnjes.
Sipas KLGJ-së, “në Gjykatën Administrative të Shkallës së Parë Lushnje ngarkesa e punës për gjyqtar është 676.3 çështje në vit për gjyqtar, ndërkohë që rendimenti është shumë i ulët, 375.6 çështje të gjykuara nga çdo gjyqtar”.
Në vijim, KLGJ shprehet në Raportin Vjetor për vitin 2023, se: “….Pjesë e stokut janë edhe 51 çështje administrative me palë kundërshtare, të regjistruara në Gjykatën Administrative të Shkallës së Parë Lushnje (pas miratimit të Hartës së Re Gjyqësore, shën.red) të cilat presin gjykimin prej më shumë se 5 vjet”.
E, pikërisht, në këtë situatë, çdo anulim séance nga gjyqtarët, mund të përkthehet në muaj të tjerë pritjeje për qytetarët.
Palët në proceset e anuluara të gjyqtarit Hazbi Balliu tashmë janë në pritje të caktimit të datës së seancës së radhës gjyqësore, datë e cila, sipas administratës së Gjykatës, “do të njoftohen me letër-thirrje”, pa dhënë asnjë detaj më tepër.
