Komisioni Europian ka nisur një hetim të thelluar ndaj Metës për shkeljen e mundshme të rregullave të BE-së të përfshira në Aktin e Shërbimeve Dixhitale për mbrojtjen e fëmijëve. Bashkimi Europian ka frikë se sistemet e Facebook dhe Instagram, duke përfshirë algoritmet e tyre, mund të stimulojnë varësinë e sjelljes tek fëmijët dhe të krijojnë efekte të izolimit dhe depresionit që janë të rrezikshme për shëndetin e tyre mendor.
“Përveç kësaj, Komisioni është gjithashtu i shqetësuar për metodat e sigurimit të moshës dhe verifikimit të vendosura nga Meta”, thuhej në deklaratë.
Hetimi po kryhet sipas Aktit të Shërbimeve Dixhitale (DSA), një ligj që detyron firmat më të mëdha të teknologjisë në botë të rrisin përpjekjet e tyre në mbrojtjen e përdoruesve evropianë në internet.
Ndërsa Thierry Breton, komisioneri i tregut të brendshëm të BE-së, tha në X se rregullatorët “nuk ishin të bindur se Meta ka bërë mjaftueshëm për të përmbushur detyrimet e DSA – për të zbutur rreziqet e efekteve negative për shëndetin fizik dhe mendor të të rinjve evropianë në platformat e saj Facebook dhe Instagram”.
Në një deklaratë, Meta tha: “Ne duam që të rinjtë të kenë përvoja të sigurta, të përshtatshme për moshën në internet dhe kemi shpenzuar një dekadë duke zhvilluar më shumë se 50 mjete dhe politika të dizajnuara për t’i mbrojtur ata.
