Është pranuar kërkesa e mazhorancës që ministri i Brendshëm, Taulant Balla të pyetet me dyer të mbyllura nga anëtarët e komisionit hetimor parlamentar për vjedhjen e sistemit TIMS.
Pas tre orësh debate komisioni miratoi të njëjtën kërkesë të deputetit socialist Nasip Naço, që ministri Balla të pyetet me dyer të mbyllura, edhe pse opozita fillimisht ka pretenduar se aty nuk ka asgjë për të fshehur.
“Po hedh për votim kërkesën e Naços që mbledhja e komisionit të bëhet me dyer të mbyllura. Mos i fusni duart kështu pa ua dhënë fjalën. Mbledhja me dëshmitarin të bëhet e mbyllur. Anëtarët e pa pajisur me certifikatë sigurie të marrin pjesë në mbledhje dhe mbledhja të zhvillohet. Më vjen mirë që sa herë ju flas unë ju kërceni përpjetë”, tha Salianji mes tensionesh pas votimit.
Bazuar në shkresën e ministrit Balla, socialistët kërkuan që mbledhja të zhvillohej me dyer të mbyllura me pretendimin se ministri dispononte informacione sekrete për të cilat Prokuroria e Tiranës po zhvillon hetime.
