Partia Demokratike ka denoncuar sot përfshirjen e zyrtarëve të bashkisë së Tiranës në afera korruptive.
“Vjedhjet në institucionet e varësisë së kryehajdutit të Tiranës Erion Veliajt nuk kanë fund.”- deklaron Klevis Balliu. koordinatori rajonal për Tiranën i PD-së.
Balliu, në një deklaratë për mediat, theksoi se Tirana Parking është në varësi të “Mr. Inceneratorit që drejtohet sot nga Erinda Fino, ish-Drejtore e Agjencisë së Parqeve dhe Rekreacionit po në varësi të bashkisë Tiranë.”.
Balliu thekson se zyrtarja e Erion Veliajt, Vilma Diçi me detyrë (Shefe) kryeinspektore e shesheve të parkimit në Tirana Parking, ka lidhur kontrata vetëm për bashkëshortin e saj, Fabjan Diçin.
Konkretisht, në datën 22 Dhjetor 2021, Fabjan Diçi, bashkëshorti i Vilma Diçi-t me detyrë (Shefe) kryeinspektore e shesheve të parkimit në Tirana Parking, bëhet pronari i shoqërisë TRADE AND CONSTRUCTION GROUP shpk.
Pasi bashkëshorti i shefes bëhet pronar, ky subjekt nga Gusht 2023 deri Prill 2024 është shpallur fitues dhe ka lidhur kontrata çuditërisht vetëm në institucionet ku punon bashkëshortja e tij, në vlerën totale 580 milion lekë të vjetra, nga këto: 2 kontrata me Tirana Parking dhe 5 kontrata të tjera me Agjencinë e Parqeve dhe Rekreacionit.
“Procedura korruptive të Veliajt të zhvilluara në mungesë totale konkurence dhe si gjithmonë në limitin e fondit për të zhvatur maksimalisht paratë e taksapaguesve të Tiranës.”- shprehet Balliu.
Sipas Veliajt të gjithë drejtuesit e emëruar prej tij hanë fiq pas shpinës së tij, por e vërteta sipas Balliut është se “ata paratë i ndajnë me shefin e tyre, kryetarin e organizatës kriminale 5D, Lali Djegësi…”.
