Gjykata e Durrësit, me kërkesë të Prokurorisë i sekuestroi pasuritë këtë të mërkurë shtetasit Saimir Gjepalit dhe familjarëve të tij, pasi dyshohet se janë përfituar nga aktiviteti i tij kriminal.
Ai është dënuar nga Gjykata e Krimeve të Rënda për veprën penale të “Trafikimi i narkotikëve” e kryer në bashkëpunim, më shumë së një herë. Po ashtu, Saimir Gjepali është dënuar dhe nga gjykata e Milanos në Itali me 24 vjet e 2 muaj burgim për veprën penale të “Pjesëmarrje në organizatë kriminale në trafikimin e lëndeve narkotike”.
Saimir Gjepali, ka qenë i arrestuar në vitin 2018 në Shqipëri për laboratorin e heroinës në Has, së bashku me anëtarët e tjerë të grupit të Avdylajve të Shijakut, ku u goditën 4 grupe kriminale.
Po ashtu, ai u bë protagonist pasi në 30 maj të vitit 2020 ishte pjesë e grupit që ndezën revoltën në burgun 313 në Tiranë, ku dhe vendosën policin me shpatulla pas tualetit. Gjithçka nisi nga qelia numër 5 në natën e 21 maj 2020 në ora 23:25 kur policët e burgjeve filluan kontrollin e qelive të burgut 313 ku ishin vendosur 4 anëtarët e grupit Avdyli dhe një italian, Giovani Di Cosimo. Në qeli me italianin ishin edhe Hajri Seferi, Astrit Avdyli, Altin Avdyli dhe Saimir Gjepali.
Nga kontrolli të paraburgosurve iu gjet një celular, pronësinë e të cilit, thotë raporti, askush nuk e pranoi duke e kundërshtuar. Sipas të paraburgosurve celularin mund ta kishte kaluar pastruesi. Gjatë kohës së kontrollit, të paraburgosurit, po sipas dosjes, kanë kundërshtuar me forcë policinë. Momentet e tensionit kanë qenë të fortë dhe efektivët janë kërcënuar me jetë dhe ofenduar nga të paraburgosurit. Kundërshtimi dhe dhuna janë dokumentuara nga pamje filmike të kamerave të brendshme të sigurisë.
Në dosje thuhet se në momentin që policët bllokuan derën e bankës brenda në dhomë që të mos hidheshin sendet e ndaluara dy të burgosur janë afruar me insistim për t’u futur në tualet duke u përplasur me policinë, madje ‘kanë përplasur policin me shpinë pas derës së tualetit’.
50-vjeçari Saimir Gjepali u arrestua sërish në Janar të vitit 2022, ku më pas u ekstradua drejt Italisë. Gjithashtu, ai ka qenë edhe subjekt i OFL-së.
Pasuritë e sekuestruara:
- nesë me 2 (dy) kate dhe garazh me sipërfaqe ndërtimi prej 150 m2, e ndërtuar pa leje dhe e vetëdeklaruar nga Saimir Gjepali me vendndodhje në Shijak;
- Lokal “Njësi” me 1 (një) kat, i ndërtuar pa leje dhe e vetëdeklaruar nga A.Gj. me vendndodhje në Shijak, me sipërfaqe ndërtimi 96 m2;
- Tokë “Arë” me sipërfaqe 4.000 m2 në fshatin Lalëz-Njwsia Administrative Ishëm të rrethit Durrës;
- Tokë “Arë” me sipërfaqe 2.000 m2, në njësinë Administrative Ishëm të rrethit Durrës; dhe
- Tokë “Arë” me sipërfaqe 2002 m2 e ndodhur në njësinë Administrative Ishëm të rrethit Durrës.
“Policia gjyqësore ka kryer hetime dhe janë siguruar prova e fakte, se Saimir Gjepali dhe familjarët e tij, kanë në pronësi pasuri që nuk justifikohen nga pikëpamja ekonomike dhe se ka dyshime të arsyeshme të mbështetura në prova e fakte që këto pasuri rrjedhin nga veprimtaria e paligjshme e kriminale të shtetasit S.Gj, për të cilat është kërkuar vendosja e masës së sigurimit pasuror sekuestro preventive.” – thuhej në njoftim.
