Prej tre ditësh i gjithë territori i Shqipërisë është i përfshirë nga moti i keq me reshje shiu intensive, breshër dhe shkarkesa elektrike.
Si pasojë e lagështisë por edhe manovrave të gabuara të drejtuesve të mjeteve, dita e shtunë ka shënuar disa aksidente të njëpasnjëshme në rrugët kombëtare por edhe në Tiranë.
- Makina “fluturon” drejt lumit të Lanës në Tiranë
Vetëm një ditë pasi një polic i ‘Shqiponjave’ përfundoi me gjithë makinë në lumin Lanë, edhe gjatë së shtunës përsëritet një tjetër aksident i ngjashëm.
Policia e Tiranës, njofton se një makinë si pasojë e shpejtësisë së madhe ka dalë nga rruga dhe ka “fluturuar” drejt lumit të Lanës në afërsi të rrethit të Shkozës.
Ngjarja e rëndë ka ndodhur në orën 05:30 të mëngjesit të sotëm, por fatmirësisht pa humbje jete, pavarësisht se makina është bërë “petë” nga përplasja e fortë.
Drejtuesi i automjetit me iniciale F.H, (35 vjec) ndodhet në spital, nën kujdesin e mjekëve, ndërsa grupi hetimor po vijon punën për sqarimin e rrethanave të aksidentit.
- Aksident në Rrugën e Arbrit, trafik kilometrik automjetesh
Një aksident është regjistruar në aksin nacional Tiranë-Dibër, duke shkaktuar radhë të gjata automjetesh.
Aksidenti është regjistruara rreth 30 minuta më parë në by-passin e mesëm të Qafë Murrizit. Ende nuk dihet nëse ka të lënduar.
Aksidenti ka shkaktuar një varg makinash prej rreth 2 km në të dyja anët e rrugës, duke bërë që dhjetëra shoferë të presin. Policia ka shkuar në vendin e ngjarjes dhe po punon për sqarimin e rrethanave.
- Aksident Pogradec
Një këmbësore është përplasur nga një automjet në aksin rrugor Pogradec-Lin pranë fshatit Udënisht.
Burimet mediatike bëjnë me dije se këmbësorja është një grua rreth të 60-ve e cila është transportuar në spitalin e Pogradecit me plagë të shumta në trup dhe ende nuk dihet gjendja e saj shëndetësore. 60-vjeçarja ka qenë duke kaluar nga një krah i rrugës në tjetrin kur mjeti e ka përplasur.
Policia mbërriti në vendngjarje, ndërkohë që pak metra më tutje janë përplasur dy automjete të tjera por pa të lënduar. Dyshimet e para për të dyja aksidentet janë se kanë ndodhur për shkak të shpejtësisë dhe lagështirës.
- Aksident në autostradën Lushnje-Fier, ‘Benzi’ përfundon në kanal
Aksident në autostradën Lushnje Fier në afërsi të kryqëzimit të Pushimit të Shoferit. Nga përplasja ka pasur dëme materiale ndërsa drejtuesi i Benzit dhe udhëtarët e tij janë në gjendje të mirë jashtë rrezikut për jetën.
“Dy mjete janë përplasur në një manovër të gabuar parakalimit. Automjeti tip Dacia me targa AB 522 KG i marrë me qira nga dy turistë ka goditur nga pas një mjet tip Benz me targa AA723 JF, i cili ka përfunduar në kanalin anësor përbri autostradës”, njofton policia.
Aksidenti ka shkaktuar radhë të gjata në autostradë duke qenë se lëvizja drejt Fierit e jugut ka pasur një numër të konsiderueshëm automjetesh.
