Konventa Kombëtare e Partisë së Lirisë, e cila u mblodh sot, ka zgjedhur Ilir Metën në postin e Presidentit (drejtuesit) të kësaj force politike. Ai mori 690 vota e ndërsa kundërshtari i tij Faik Basha vetëm 27 vota.
Pas zgjedhjes si President i PL, Meta tha se e kishte menduar që sapo të zgjidhej në këtë detyrë, do të paraqitej poshtë banesës së ish-kryeministrit Sali Berisha, për t’u solidarizuar me të.
Ai tha gjithashtu se për t’iu bashkuar protestave poshtë ballkonit të Berishës ai kishte pritur një ftesë nga deputeti Flamur Noka, por meqë ai nuk e kishte ftuar, vendosi të shkonte vetë.
“Unë kisha kohë që prisja ftesë nga miku im Flamur Noka. Ai kishte harruar të më ftonte dhe unë thash se pasi të bëhem president duhet të paraqitem fillimisht te presidenti i përgjithshëm i Republikës që është Sali Berisha.
Isha këtu bashkë me mijëra qytetarë për të shprehur solidaritetin tim për kontributin e jashtëzakonshëm që po jep Berisha për lirinë e shqiptarëve dhe sovranitetin e Republikës. Ne çdo ditë kemi qenë këtu, me mendje dhe me zemër. Sepse Gjokutaj që është avokat i Berishës është edhe eksponent i PL-së. Por më e rëndësishmja është të jemi këtu për përmbysjen e regjimit.
Mesazhi im është shkundje, shkundje dhe vetëm shkundje. Shqiptarët kanë shqetësimin e 500 lidhjeve nepotike në tatime e dogana që iu rrëmbejnë shqiptarëve 3.3 miliardë euro në vit”, tha Meta përmes një lidhjeje për emisionin “Review”.
