Kukësi dhe Egnatia janë dy ekipet finaliste të Kupës së Shqipërisë për sezonin 2023/2024. Të dyja ekipet do të përballen së bashku në finalen e madhe të 14 majit në stadiumin “Air Albania”, ora 19:00.
Tirana fitoi sfidën e kthimit ndaj Kukësit me rezultatin 1-0, megjithatë verilindorët ja dolën mbanë të siguronin finalen pas triumfit në takimin e parë 2-0.
Kjo do të jetë finalja e pestë në histori për Kukësin që e ka fituar dy herë trofeun e Kupës së Shqipërisë.
Në stadiumin “Loro Boriçi”, Vllaznia fitoi 1-0 ndeshjen e kthimit ndaj Egnatias dhe sfida shkoi në shtesë, pasi rrogozhinasit kishin triumfuar në takimin e parë me të njëjtin rezultat.
Në pjesën e parë të kohës shtesë, Egnatia barazoi rezultatin me Montenegron dhe deri në fund nuk ndryshoi asgjë. Rrogozhinasit siguruan finalen e dytë në histori, pas asaj të sezonin 2022/2023 ku fituan edhe për herë të parë trofeun e Kupës së Shqipërisë pasi mposhtën 1-0 Tiranën.
