Dy persona janë arrestuar nga Policia e Korçës, pasi janë kapur duke transportuar në flagrancë, në aksin Korçë-Voskop, tre thasë me kanabis, me peshë totale 12.5 kg.
Në kuadër të operacionit “Sinjali” janë vënë në pranga shtetasit Klajdi Shaholli, 29 vjeç, banues në fshatin Voskop dhe Haxhi Mero, 38 vjeç, banues në fshatin Vashtëmi.
“Nga kontrolli në automjetin tip “Audi”, që drejtonte 29-vjeçari dhe ku ishte pasagjer shtetasi H. M., shërbimet e Policisë gjetën 3 thasë me rreth 12.5 kg cannabis sativa. Lënda narkotike që po transportohej me qëllim shitjen, u sekuestrua në cilësinë e provës materiale, bashkë me automjeti tip “Audi” dhe me një shumë eurosh.” – thuhet në njoftimin e Policisë.
Materialet procedurale i kaluan Prokurorisë së Korçës, për veprime të mëtejshme.
