Ditën e sotme nisi zbatimi i ligjit për amnistinë penale, ku do të përfitojnë 1100 të dënuar, prej të cilëve 700 do të lirohen menjëherë dhe 400 të tjerë përfitojnë ulje dënimi. Një prej atyre që përfiton është edhe ish-kreu i Bashkisë së Lezhës, Fran Frrokaj, i cili pritet të lirohet ditën e sotme nga burgu.
Gjykata e Posaçme kundër Korrupsionit dhe Krimit të Organizuar e ka dënuar më 1 Mars të këtij viti me 2 vite burg Fran Frrokajn, por për shkak të gjykimit të shkurtuar, dënimi atij i zbriti në 1.4 vite burg.
Fr4an Frrokaj u shpall fajtor për veprën penale “Shpërdorim i detyrës” në lidhje me tjetërsimin e pronave tek “Rana e Hedhun” në Shëngjin, hetime që nisën në vitin 2019-të, kur SPAK arriti të provojë përfitimin në mënyre të paligjshme të 66 mijë metrave katror tokë në bregdetin e Lezhës, më vlerë 13 milionë euro.
Gjithashtu, ish-kireu i Bashkisë së Lezhës është dënuar nga GJKKO dhe me heqjen e të drejtës për të ushtruar funksione publike për një afat kohor 5 vjeçar.
Hetimet për tjetërsimin e pronave në bregdetin e Shëngjinit nisën në 2017 kur një qytetar denoncoi se toka e tij rezultonte në Hipoteke në emër të disa familjeve të tjera. Prokuroria zbuloi një sipërfaqe të madhe toke prej 234 mijë metrash katrorë tokë në zonën e Ranës së Hedhun që ishte përfituar përmes falsifikimit të dokumenteve. Bashkia Lezhë dhe Këshilli i Qarkut Lezhë “nëpërmjet shkresave përkatëse zyrtare, pavarësisht se në realitet (tokat) janë mal dhe ranishte i kanë konfirmuar si toka të kategorisë “Arë” dhe “Pemtore”. Sipas vendimit për sekuestrim parcelat ishin regjistruar në emër të personave që nuk kishin të drejtë të përfitonin tokë në atë zonë.
