Egnatia është kthyer për të dytin edicion radhazi në finalen e Kupës së Shqipërisë.
Klubi nga Rrogozhina ka kaluar falë kohëve shtesë Vllazninë në një duel dramatik në “Loro Boriçi”.
Shkodranët dominuan pjesën e parë, duke synuar që të gjenin golin që do të barazonte duelin pas humbjes 1-0 ndaj rrogozhinasve në transfertë.
Ata krijuan më shumë lojë dhe raste, të ndihmuar edhe nga dëmtimet e lojtarëve kyç të skuadrës së Tetovës si Zejnullai dhe Ndreca.
Goli i Alivodës barazoi duelin, teksa bëri që ndeshja të bëhej më e kujdesshme nga të dy ekipet.
Ata nuk arritën të shënonin më, duke çuar ndeshjen në shtesa. Aty ishte fillimisht Aleksi i cili komplikoi planet e skuadrës së tij me një karton të kuq.
Por në minutën e 103-të, Montenegro gjeti golin e barazimit të kësaj sfide, duke kthyer Egnatian në avantazh në bilancin e përgjithshëm.
Rezultati nuk ndryshoi në fund dhe kështu, Egnatia siguroi një tjetër finale të Kupës së Shqipërisë, ku do të kërkojë të përsëritë suksesin e sezonit të kaluar ku bëri të sajën trofeun teksa këtë herë përballë ka Kukësin.
