Mazhoranca dhe kreu i Bashkisë së Tiranës, Erion Veliaj kanë refuzuar këtë të hënë dy kërkesat e opozitës në mbledhjen e Këshillit Bashkiak në lidhje me aferën “5D”, ku gjysmit e drejtorëvwe të kësaj bashkie janë në burg apo nën hetim për korrupsion.
Dy kërkesat e opozitës në mbledhjen e Këshillit Bashkiak kanë qenë një mbledhje urgjente në lidhje me këtë aferë, si dhe një auditim i jashtëm i Bashkisë së Tiranës nga ekspertë të pavarur. Të dyja kërkesat janl refuzuar nga mazhoranca në shkelje të ligjit, duke nxjerrë justifikime qesharake dhe duke i shtyrë me justifikimin se do të diskutohen në një mbledhje tjetër.
Ajo që ra në sy ishte se opozita në këtë aksion për të kërkuar llogari ndaj Veliajt ishte e bashkuar. Kërkesat ishin firmosur nga anëtarë të koalicionit “Bashkë Fitojmë”, PD e Lulzim Bashës, Nisma Thurje dhe aleatë të tjerë të forcave opozitare.
Në mungesë të plotë transparence, mbledhja e sotme e Këshillit Bashkiak të Tiranës, nmuk u transmetua për mediat, që Veliaj të fshihte akuzat e opozitës drejt tij në lidhje me aferën “5D”.
Pas përfundimit të mbledhjes, anëtari i opozitës në Këshillin Bashkiak, Ilir Alimehmeti në një prononcim për mediat deklaroi se kërkesa është bërë në përputhje të ligjit, duke u firmosur nga 21 këshilltarë, 1/3 e anltarëve të Këshillit.
Sipas Alimehmeti, mazhoranca është fajtore me veprim apo edhe me mosveprim. Ai deklaroi më tej se fakti që gjendet çdo lloj artifice për ta refuzuar, tregon se Veliaj dhe socialistët e tjerë në Bashki kanë frikë nga auditimi.
Ilir Alimehmeti: Këshilli Bashkiak i Tiranës, vazhdon të mbajë me veprime ose jo një pozicion të paqartë përballë këtyre që po ndodhin. Të vetmit ata që nuk dinë asgjë apo që nuk duan të merren me këtë punë janë Këshilli Bashkiak i Tiranës dhe Bashkia e Tiranës. I bëmë thirrje dhe kërkesë këshilltarëve të PS-së, dhe me shkresë më datë 5 Prill, për t’u bashkuar bashkë dhe për të bërë menjëherë një mbledhje urgjente, se nuk ka urgjencë më të madhe se sa kjo situatë që ndodhemi. Dhe jo vetëm që nuk iu bashkuan vendimit, por shkojnë dhe gjejnë situata, nuk kishit iu firma mjaftueshëm. Atëhere ne sot, datë 22 Prill, i paraqitëm një shkresë me 21 firma këshilltarësh bashkiak, që do të thotë 1/3 e këshilltarëve të Bashkisë së Tiranës, me firmat e opozitës, 7 forca të ndryshme politike të bashkuara bashkë, sepse kundra korrupsionit qëndrojmë të bashkuar bashkë dhe menjëherë u kriju artifica, jo kjo do të diskutohet në një mbledhje tjetër. Pra urgjenca në Bashkinë e Tiranës nuk është vjedhja e dhjetra miliona eurove. Urgjenca në Bashkinë e Tiranës nuk është çështja që puna këtu është ndalur, është bllokuar, drejtorët janë në burg, janë nën hetim. Nuk duket se është kjo funksioni i Këshillit Bashkiak. Ligji e përcakton qartë që Këshilli Bashkiak organizon dhe mbikëqyr kontrollin e brendshëm të bashkisë, ndërkohë që qëndrimi politik i PS-së në këtë mbledhje ishte: “nuk është puna jonë kjo”. Nëse ata duan t’i lajmë duart dhe duan të fshihen pas gishtit dhe të mos bëjnë detyrën e tyre, kujtoj se janë fajtor me veprim apo mosveprim. Ne do të vazhdojmë të kërkojmë seancën e posaçme, që e kemi kërkuar brenda ligjit. Është kërkuar mbledhje urgjente, por është kërkuar edhe auditi i jashtëm i Bashkisë Tiranë për të gjitha financat, nga një ekspert i pavarur, ekspert ndërkombëtar auditus, të gjejnë ata, nëse ka apo jo probleme kjo bashki, abuzime fondesh kjo bashki, korrupsion apo vjedhje kjo bashki dhe nëse nuk ka, do të jemi të gjithë shumë të lumtur. Ne kërkojmë këtë auditim të jashtëm që të bëhet transparencë. Fakti që gjehet çdo lloj artifice për ta refuzuar, tregon që kanë frikë nga një audit i jashtëm.
Kujtojmë se në lidhje me dosjen “5D” SPAK ka arrestuar tre prej drejtorëve të Bashkisë së Tiranës, Taulant Tusha, Redi Molla dhe Mariglen Qato, si dhe ka vënë nën hetim disa drejtorë dhe zyrtarë të tjerë të bashkisë. Nga hetimet ka rezultuar se Redi Molla dhe Mariglen Qato, duke e kontrolluar indirekt kompaninë “5D” kanë përfituar dhjetra miliona euro nga prokurimet publike të Bashkisë së Tiranës.
“Nga burimet e provave të mbledhura në kuadër të hetimeve të këtij procedimi penal janë krijuar dyshime të arsyeshme se shtetasit Redi Molla dhe Mariglen Qato janë ortakët e vërtetë dhe pronarët “de facto” të shoqërisë “5D Konstruksion” sh.p.k. Shtetasit Redi Molla dhe Mariglen Qato e kanë zotëruar këtë shoqëri tregtare në mënyrë indirekte, duke përdorur persona të tjerë, shtetasit Eduard Meta, Muhamet Petriti dhe Nestor Muhametllari, si ortakë fiktiv në aktet e rregjistrimit dhe funksionimit të shoqërisë, me të cilët ortakët e vërtetë të shoqërisë kanë pasur lidhje shoqërore dhe lidhje miqësore. Nga veprimet hetimore të kryera është provuar fakti se shoqëria tregtare “V.A.S Konstruksion” sh.p.k e njëjtë me “5D Konstruksion” sh.p.k, ka marrë pjesë dhe është shpallur fituese në kundërshtim me rregullat e prokurimit publik, në disa procedura prokurimi të organizuara nga autoriteti kontraktor Bashkia Tiranë.” – thuhej në njoftimin e SPAK.
