Policia e Shtetit ka arrestuar një person të shpallur në kërkim në kuadër të operacionit të koduar “SAFE TRIP”, i cili akuzohet si pjesë e grupit kriminal që merreshin me trafikimin e qenieve njerëzore, kryesisht klandestinë nga Bagladeshi, të cilët vinin në vendin tonë me kontrata fiktive punësimi dhe më pas largoheshin drejt vendeve të Bashkimit Europian.
Autoritetet policore raportojnë se në pranga është vënë shtetasit Faik Matmuja, 53 vjeç, banues në Kukës.
“Ky shtetas ishte shpallur në kërkim, pasi Gjykata e Posaçme e Shkallës së Parë për Korrupsionin dhe Krimin e Organizuar i ka caktuar masën e sigurisë “Arrest në burg”, për veprat penale “Ndihma për kalim të paligjshëm të kufijve”, kryer në formën e bashkëpunimit të veçantë, “Grupi i strukturuar kriminal” dhe “Kryerja e veprave penale nga organizata kriminale apo grupi kriminal”.” – thuhet në njoftimin e Policisë.
Numri i të arrestuarve në total në kuadër të këtij operacioni ka shkuar në 20 të prangosur, teksa i vemti që vijon të jetë ende në kërkim është shtetasi A. M., 45 vjeç, me vendqendrim në Tiranë.
Policia njofton se në bashkëpunim me SPAK vazhdon puna për zbardhjen dhe dokumentimin e ngjarjeve të tjera ku mund të jenë përfshirë këta shtetas. Materialet procedurale i kaluan për ndjekje të mëtejshme SPAK-ut.
Më herët janë vënë në pranga dhe shtetasit: Endri Seiti, Luan Tafalla, Endrit Ismailaj, Arnol Shpata, Xhuljeta Çopa, Artur Mata, Antonio Specchio, Artan Sulaj, Luan Sulaj, Shkëlzen Matmuja (Bokçiu), Bukurosh Muja, Altin Hasani, Edmond Barha, Lulzim Lami, Tomë Preka, Xhulio Krasniqi, Edmond Baklli, Iglan Alliçi dhe Emmanuel Ella.
Sipas Policisë së Shtetit, nga hetimi ka rezultuar se 5 subjekte private siguronin kontrata pune fiktive për qytetarë nga Bangladeshi dhe shtete të tjera kundrejt ryshfetit prej 5 mijë eurosh. Pasi i prisnin në Rinas dhe merrnin shumën përkatëse, emigrantët largoheshin drejt vendeve të BE-së. Pjesë e grupit ishin biznesmenë dhe efektivë të Policisë.
Policia e Shtetit ka publikuar dhe pmajet e arrestimit të shtetasit Faik Matmuja, i cili është kapur duke pirë kafe në një lokal me një person tjetër.
