Nga Boldnews.al
Hetimi i Prokurorisë së Tiranës për ndërhyrjen e paligjshme në sistemin TIMS, zbuloi edhe një skandal të rëndë në mënyrë e emërimin e drejtorit të Teknologjisë së Informacionit, Ervin Muça, në një pozicion shumë delikat në Drejtorinë e Përgjithshme të Policisë.
Në njoftimin e shpërndarë për median, pasi gjykata vendosi “arrest në shtëpi” për Muçën, prokurorët deklaruan ndër të tjera se mbi Muçën ekzistojnë dyshime mbi integritetin e tij personal.
Ai është raportuar për falsifikim dokumentash në Bari, në vitin 2007 dhe një vit më pas i është refuzuar leja e qëndrimit në Itali. Gjithashtu, Ervin Muça, në kohën që mbante postin e drejtorit të IT në Policinë e Shtetit, ishte njëkohësisht edhe këshilltar i jashtë në Agjencinë e Kadastrës, gjë që është në kundërshtim me ligjin.
Këto të dhëna ngrenë pikëpyetje të forta mbi mënyrën e rekrutimit të tij, në shkelje të ligjit dhe pa kryer verifikimet e duhura. Përgjegjësia për emërimin e tij bie mbi Drejtorin e Përgjithshëm të Policisë së Shtetit, Muhamet Rrumbullaku, si titullari që ka firmosur emërimin e tij në postin e drejtorit të IT, në qershor 2023.
Përgjegjësia e Rrumbullakut shtrihet më tej në kohë, ku rezulton se nuk ka marrë asnjë masë, më së paku pezullimi për Muçën, që në gusht të vitit të kaluar, kur u raportua për herë të parë skandali i ndërhyrjes së paligjshme në sistemin TIMS.
Rekrutimi problematik i Muçës
Ervin Muça u emërua në postin e Drejtorit të IT-së në Policinë e Shtetit, në qershor të vitit të kaluar. Pozicioni që ai mori shoqërohet me gradën policore “Drejtues i Parë”. Kjo gradë është karriere, pra që e përfitojnë oficerët e Policisë, të cilët duhet të kenë një përvojë disa-vjeçare dhe të kenë treguar integritet e profesionalizëm.
Në rastin e Ervin Muçës, ai mori “apriori” gradën “drejtues i parë”, ndërkohë që nuk kishte ushtruar asnjë ditë punën e oficerit të Policisë.
Gjithashtu, emërimi i tij në postin delikat brenda Policisë së Shtetit është kryer pa një verifikm të plotë të figurës së tij.
Hetimi i Prokurorisë për të kaluarën e Ervin Muçës u bazua në të dhënat e administruara nga Agjencia e Mbikqyrjes Policore (AMP) në Ministrinë e Brendshme. Një verifikim paraprak për figurën e Muçës, ose më saktë, një koordinim mes strukturave të Ministrisë së Brendshme dhe Drejtorisë së Policisë, mund të zbulonte lehtësisht problematikat që lidhen me integritetin e drejtorit të ri.
Por, duket se titullari i emërtesës, pra Drejtori i Përgjithshëm i Policisë, Rrumbullaku, duket se e ka anashkaluar verifikimin ose, në rastin më të keq, nuk i ka konsideruar të dhënat e AMP-së, nëse ato i ka pasur në dispozicion.
Mos-reagimi pas skandalit TIMS
Pas emërimit problematik, emri i Ervin Muçës doli në skandalin e ndërhyrjes në TIMS, në gusht 2023, vetëm dy muaj pasi ai kishte marrë detyrën e drejtorit të IT-së në Policinë e Shtetit.
Të dhënat e publikuara fillimisht në media me burime nga brenda radhëve të Policisë së Shtetit dhe më tej shqetësimi publik, i shprehur nga përfaqësuesi i Ambasadës Amerikane në Tiranë, u shpërfillën nga drejtori i Policisë, Rrumbullaku.
Ervin Muça u pezullua vetëm për disa ditë, në gusht 2023 dhe më tej ai u rikthye sërish në postin e drejtorit të IT-së, megjithëse ai ishte i dyshuari kryesor për ndërhyrjen e paligjshme në sistemin e të dhënave të hyrje-daljeve të qytetarëve shqiptarë dhe skedave kriminale të personave të ndryshëm.
Kreu i Policisë së Shtetit, Muhamet Rrumbullaku, nënshkroi vendimin “formal” të pezullimit nga detyra të Ervin Muçës, në 9 Prill 2024, pra tetë muaj pas skandalit, vetëm pasi gjykata e Tiranës caktoi ndaj tij masën e “arrestit në shtëpi” dhe “pezullimit nga detyra”.
