Policia e Lezhë ka dalë me një komunikatë zyrtare në lidhje me aksidentin masiv të regjistruar pasditen e kësaj të diele në Shëngjin, ku u përplasën tre makina dhe për pasojë mbetën të plagosur tre persona.
Autoritetet policore bëjnë me dije se kanë arrestuar një prej drejtuesve të automjeteve, shtetasin T. N., 63 vjeç pasi ka qenë i dehur, në momentin kur ka shkaktuar aksidentitn.
“Specialistët e Sektorit të Policisë Rrugore kanë arrestuar në flagrancë shtetasin T. N., 63 vjeç, banues në Lezhë, për veprën penale “Drejtimi i automjetit në mënyrë të parregullt”. Arrestimi i këtij shtetasi u bë pasi sot, rreth orës 17:20, në Shëngjin, automjeti tip “Audi”, që ai e drejtonte në gjendje të dehur, është përfshirë në aksident me 2 automjete të tjera tip “Benz”.” – thuhet në njoftimin e autoriteteve.
Nga përplasja e fortë e tre makinave kanë mbetur të plagosur dy gra dhe një i mitur 10 vjeç, të cilët ndodhen jashtë rrezikut për jetën.
“Si pasojë janë dëmtuar drejtuesja e njërit prej automjeteve tip “Benz”, shtetasja Xh. M., 39 vjeçe dhe 2 pasagjerë në automjetin e saj, një 30-vjeçare dhe një 10-vjeçar, të cilët janë dërguar në spital dhe janë jashtë rrezikut për jetën.” – njofton Policia.
Materialet procedurale do t’i kalojnë Prokurorisë, për veprime të mëtejshme.
