Detaje të reja janë zbuluar nga operacioni i Prokurorisë dhe Policisë së Shtetit te Kadastra e Durrësit ku u arrestuan pesë persona. Ata akuzohen se në bashkëpunim me njëri-tjetrin kanë tjetërsuar dokumentet e një toke me sipërfaqe 448,000 m2, në lagjen nr. 15, Durrës. Ndërkohë 2 persona janë shpallur në kërkim, ndërsa 9 të tjerë janë lënë me masën detyrim paraqitje.
Një nga të arrestuarit është edhe ish-kandidati i PS-së në Durrës, Ardit Kërtusha 33-vjeç, ish-kryetar i FRESSH. Ardit Kërtusha kandidoi për kryetar të PS Durrës në 2020 dhe më pas u tërhoq nga gara. 31-vjeçari në zgjedhjet e 25 prillit 2023 kapërceu nga PS për tek PD.
Më 16 maj të 2022, Ardit Kërtusha i shpëtoi një atentati në një lokal të frekuentuar në zonën e Currilave në Durrës në pronësi të reperit Noizy, ku ai mbeti i plagosur. Atentatori ishte me kapuç dhe me dy pistoleta ndërsa qëlloi në drejtim të Kërtushës katër herë. Fatmirësisht autorit iu bllokua arma.
Ardit Kërtusha, së bashku me ish-drejtorin e Hipotekës së Durrësit, Leonard Kadrimi dhe një zyrtar tjetër me inicialet M. Z., në kërkim, dyshohet se duke shpërdoruar detyrën në ASHK Durrës, kanë lehtësuar tjetërsimin e pasurisë së paluajtshme, bën të ditur Prokuroria. Ardit Kërtusha, 33 vjeç dhe Gjovalin Ndoci, 44 vjeç, të dy banues në Durrës, akuzohen për veprën penale “Pastrimi i produkteve të veprës penale ose veprimtarisë kriminale”.
LEXO EDHE:
