Policia ka dalë me një reagim zyrtar në lidhje me ngjarjen që u raportua paraditen e kësaj të enjte, ku një sasi tritoli ishte vendosur në automjetin në pronësi të shtetasit Fatmir Lika, në Kurbin.
Lidhur me rastin Policia bën me dije se tritoli është vendosur nga një i afërm i Likës, tashmë i shpallur në kërkim, i cili kishte për qëllim kanosjen për shkak të disa konflikteve të hershme që kishin mes tyre. Sasia e tritolit nuk ka shpërthyer pasi forcat antieksploziv e kanë çaktivizuar.
Sakaq ka nisur procedimi në gjendje të lirë për një tjetër shtetas që dyshohet si bashkëpuntor në këtë rast.
“Pas njoftimit se rreth orës 04:00 të mëngjesit të sotëm, në fshatin Malbardhë, në automjetin e shtetasit F. L., 34 vjeç, ishte vënë një sasi lënde plasëse, e cila nuk kishte shpërthyer, shërbimet e Komisariatit të Policisë Kurbin dhe ekspertët xhenierë shkuan në vendin e ngjarjes.
Si rezultat u bë i mundur identifikimi dhe shpallja në kërkim e autorit të dyshuar të këtij rasti, shtetasit A. L. (i afërm i shtetasit F. L.). Nga këto veprime dyshohet se ky shtetas e ka vënë lëndën plasëse, për të kanosur shtetasin F. L., për shkak të konflikteve të mëparshme me të.
Gjithashtu, u referuan materialet në Prokurori ku nisi procedimi në gjendje të lirë për shtetasin Z. L., pasi dyshohet si bashkëpunëtor në këtë rast”,- njofton Policia.
Vijojnë kërkimet intensive për kapjen e shtetasit A. L., si dhe në drejtimin e Prokurorisë vijojnë hetimet për të zbardhur dhe dokumentuar rrethanat e rastit.
