Arsenal-Bayern ishte një ndeshje me gola dhe spektakël, por kishte edhe episode të diskutueshme që u folën shumë pas ndeshjes. Një ndër to ishte kur portieri i Arsenalit pasi arbitri vërshëlleu pasoi topin te mbrojtësi. Kyi fundit e mori topin me dorë brenda zonës, por gjyqtari nuk akordoi penallti.
Një moment që nuk u ‘kapërdie’ lehtë nga tifozët bavarezë, por as nga drejtuesit, stafi dhe trajneri. Pas Drejtorit, Max Eberl, edhe trajneri Thomas Tuchel flet për këtë moment. Ai shprehet se arbitri bëri një gabim trashanik, teksa tregon edhe shpjegimin që kryesori u bëri lojtarëve.
“Gjyqtari bëri një gabim trashanik, nuk akordoi penallti për një prekje të topit me dorë! E di që ishte një situatë në limite, por ata e vendosën topin në tokë, arbitri akordoi nisjen e lojës dhe mbrojtësi e ndaloi topin me dorë. Ajo që na zemëron është shpjegimi në fushë.
Ai u tha lojtarëve tanë se ishte një ‘gabim foshnjërak’ dhe se nuk mund të akordojë një penallti të tillë në çerekfinalen e Ligës së Kampionëve. Është një shpjegim i tmerrshëm. Nuk ka rëndësi nëse është gabim foshnjërak apo prej të rrituri. Ndaj nesh është marrë një vendim që na penalizon”, tha Tuchel.
