Janë zbardhur identetitet e dy viktima të aksidentit të regjistruar këtë të mërkurë, rreth orës 14:05, në Fushë Kuqe të Kurbinit.
Burime bëjnë me dije se kanë humbur jetën drejtuesi i zetorit, shtetasi Ismajl Ismaili, 60-vjeç, banues në Fushë Kuqe dhe pasagjeri në zetor, shtetasi Gjin Muhaj 21-vjeç banues në Mirditë. Ky i fundit mësohet se ishte marrë si punëtor nga Ismaili për ta ndihmuar.
Sipas njoftimit të autoriteteve policore, Ismajl Ismaili dyshohet se ka humbur kontrollin mbi drejtimin e zetorit dhe për pasojë janë përmbysur në kanal, ku dy viktimat janë zënë poshtë nga mjeti bujqësor.
Kanë qenë banorë të zonës të cilët kanë konstatuar aksidentin dhe kanë tentuar t’u japin ndihmën e parë dy personave, por ata u gjetën në kanal pa shenja jete. Trupat e dy viktimave u nxorrën nga uji dhe u dërguan në morgun e spitalit të Laçit.
Burime bëjnë me dije se Smajl Ismaili merrej prej vitesh me bujqësi. Bashkë me punëtorin e tij, ata sapo kishin konsumuar drekën dhe ishin nisur për të punuar tokën me mjetin bujqesor.
Një dëshmimtar, në një prononcim për mediat tregon se kishte qenë djali i tij, i sapoardhur nga Belgjika, i cili ishte futur në kanal për t’u dhënë ndihmën e parë, por kishte rezultuar e kotë. Sipas tij, 21-vjeçari Gjin Muhaj ishte në gjendje të vështirë ekonomike dhe punonte me Ismailin.
“Sapo morëm vesh që ka rënë zetori dolën. Djali im që ka ardhur nga Belgjika u fut deri në mes në llucë e ujë, preku këmbën e njërit që ishte poshtë gomave. Zetori ishte përmbys. Ata kishte zënë përmbys. Nga shtëpia po shkonin tek toka të punonin. Ai merrej me bostan, djali ishte hallexhi, e merrte në punë” thotë banori i zonës.
Grupi hetimor po punon për sqarimim e rrethanave të aksidentit që i mori jetën dy personave.
