Mediat italiane kanë publikuar pamjet e arrestimit të 55-vjeçarit nga Rubiku, Gjovalin Lesi, i cili u vu në pranga në kuadër të operacionit policor të koduar “Verdikti” në Matera të Italisë.
Ai ishte shpallur në kërkim ndërkombëtar nga drejtësia shqiptare, pasi në vitin 1997 ka vrarë me armë zjarri kallashnikov pas një konflikti për motive të dobëta, kunatin dhe motrën e tij. Për këtë vepër penale, Gjovalin Lesi është dënuar me burgim të përjetshëm.
Sipas autoriteteve policore italiane, Gjovalin Lesi është arratisur drejt shtetit fqinj që prej vitit 2003 dhe për t’i shpëtuar arrestimit përdorte identitetin e vëllait të tij të sëmurë.
Policia italiane e ka gjetur 55-vjeçarin në shtëpinë e tij dhe siç duket nga pamjet, pasi e kanë vënë në pranga kanë kryer një kontroll të detajuar. Më pas, ai është transportuar drejt burgut të Matera-s, ku do të presë derisa të ekstradohet drejt vendit tonë.
“Gjykata e Mirditës, në vitin 1998, e ka dënuar shtetasin Gjovalin Lesi, me burgim të përjetshëm, për veprat penale “Vrasja me paramendim” dhe “Mbajtja pa leje dhe prodhimi i armëve, armëve shpërthyese dhe i municionit”. Më datë 21.10.1997, në Rubik, pas një konflikti për motive të dobëta, ai ka vrarë më armë zjarri kallashnikov, kunatin dhe motrën e tij, përkatësisht shtetasit A. Gj. dhe M. Gj..” – thuhej në njoftimin e Policisë.
