Deputetët e Partisë Socialiste kanë bojkotuar mbledhjen e sotme të Komisionit Hetimor Parlamentar për dy koncesionet në shëndetësi, ai i sterilizimit dhe check up-it. Kjo është mbledhja e dytë rresht e këtij komisioni që bojkotohet nga socialistët, pas asaj të së mërkurës.
Kryetarja e këtij komisionit, Albana Vokshi, tha se mosprezenca është mënyra që ka zgjedhur mazhoranca të bllokojë punën. Deputetja demokrate deklaroi se nuk do të presin kolegët socialistë, por do të vijojnë me hetimin parlamentar, duke bërë me dije që duke nisur nga sot do të dërgojnë shkresat për informacion në të gjitha institucionet.
Vokshi tha se më shumë se 40 shkresa do t’u dërgohen institucioneve për informacion. Ajo u bëri apel institucioneve të përgjigjen pasi të marrin shkresat dhe të mos bien pre e presioneve.
“Mënyra sesi kanë zgjedhur që të pengojnë punën e komisionit, është mosprezenca. Është shumë e qartë që Edi Rama nuk do që ky komision të zhvillojë punimet, deputetët, në konflikt interesi, nuk kanë dëshirë për të vijuar punimet e këtij komisioni, pavarësisht se rregullores. Kishin në rend dite shqyrtimin e dokumenteve të përgatitur së bashku me ekspertët ligjorë të emëruar nga ky komision, janë kërkesa për informacion në të gjithë institucionet për pasur një pamje më të detajuar të asaj çfarë ka ndodhur me dy koncesionet abuzive korruptive. Meqë ata nuk duan që ti nxjerrin këto kërkesa për informacion, ne nuk do presim më kur të kenë dëshirë. Do të dërgojmë shkresat që sot në të gjitha institucionet. Nuk kemi kohë për të humbur, hetimi parlametar të fillojë sa më parë.
Rregullorja i ka dhënë një instrument opozitës për të thirrur mbledhjes dhe kur mazhoranca nuk do. Neni përcakton se nëse mazhoranca nuk dëshiron, ¼ mund ta caktojnë bashkë me orën dhe rendin e ditës. Me firmat e shtatë deputetëve, para dy ditësh, njoftuam mbledhjen sot. Por siç e shikoni, për herë të dytë radhazi, pa asnjë arsye nuk janë paraqitur, duke vazhduar në vazhdën e shkeljeve të rregullores së Kuvendit dhe Kushtetutës Para se të mblidheshim bisedova me Ndrecën, për rregullore të posaçme, por është refuzuar me arsyetimin se kur është miratuar ligji që punimet e komisioneve do të vijojnë sipas rregullores së Kuvendit Pse mazhoranca refuzon? Sepse Ramës nuk i intereson që ky komision të nisë punimet. Nuk erdhën në mbledhjen e 4 sepse nuk duan hetim dhe transparencë për vjedhjen e 200 milionë eurove.
Kemi mbledhur firmat për mbledhjen e radhës të martën në 10:30. Për të mos pritur deputetët e PS ne kemi firmosur 40 a më shumë shkresa dhe do t’i kërkojmë Kuvendit që tua adresojë institucioneve të ndryshme. Do t’i kërkoja institucioneve që në momentin që marrin shkresa, të kthejnë përgjigje, dhe të mos bien pre e presionit, por të ndihmojnë në zbardhjen e kësaj skeme korruptive. I jemi drejtuar Kryeministrisë me një shkresë, KLSH me dy shkresa për auditimet, Ministrisë së Financave dhe asaj të Shëndetësisë, për paketën e dokumenteve që disponojnë. Gjithashtu i jemi adresuar, ministres së Shëndetësisë, Albana Koçiut dhe Drejtorit të Fondit të Sigurimit të Kujdesit Shëndetësor përsa i përket fondeve dhe se ku gjendet baza e të dhënave dhe laboratorët e përcaktuar për Check-Up, se ku janë ndërtuar.”, tha Vokshi.
Kujtojmë se në mbledhjen e fundit kur ishin prezent, mazhoranca rrëzoi kërkesën për të plotësuar formularët nëse anëtarët e komisionit kanë apo jo konflikt interesi. Formularët u plotësuan vetëm nga ana e mazhorancës.
Vokshi iu drejtua socialistëve se kanë frikë të firmosin deklaratën, pasi sipas saj deputeti Plarent Ndreca është në konflikt të interesit, pasi ka qenë avokat i një prej të akuzuarve për koncesionin e sterilizimit, ku bëhet fjalë për Arben Gjatë. Ndërkohë, deputetja e PD-së, Ina Zhupa deklaroi se edhe anëtarja tjetër e komisionit nga ana e mazhorancës, Milva Ekonomi është në konflikt interesi, pasi ka qenë zv.ministre e Shëndetësisë në kohën kur janë dhënë koncesionet. Duke iu referuar lajmeve, Zhupa tha se Ekonomi ka firmosur pasi ka qenë kryetare e komisionit të vlerësimit të ofertave dhe për këtë ka dëshmuar edhe në SPAK.
