Ish zyrtarja e Ministrisë së Financave, Alda Klosi është liruar nga burgu, pasi ka përfunduar dënimin e dhënë nga Gjykata e Tiranës më 19 Mars të këtij viti.
Klosi u shpall fajtore për verën penale “fshehje dhe mosdeklarim të pasurisë”, duke u dënuar me 2 vite e 6 muaj burgim, por për shkak të gjykimit të shkurtuar dënimi iu ul në 20 muaj burgim. Në të njëjtën dosje, u dënuan dhe sanitarja Rozeta Dobi dhe djali i saj Havier Dobi, ku nënë e bir u shpallën fajtor për veprën penale “vjedhje me pasoja të rënda” kryer në bashkëpunim dhe u dënuan konkretisht me 7 dhe 5 vite burgim.
Ndërkohë pas lirimit nga burgu, ajo do të qëndrojë në “arrest shtëpie” për llogari të akuzës së dytë të “pastrimit të parave”, derisa prokuroria të vendosë pas afatit që i la gjykata.
Kujtojmë se në dhjetor të vitit 2022, Alda Klosi denoncoi se sanitarja Rozeta Dobi i kishte grabitur banesën e saj, por nuk tregoi për shumën e plotë të parave, por për një vlerë më të vogël dhe për vjedhje bizhuterish. Nga hetimi u zbulua se ishin vjedhur 120 mijë euro nga pastruesja, të cilat Alda Klosi më pas i justifikoi duke thënë se janë të xhaxhait të saj që jeton në Amerikë.
Në një kontroll të dytë, Policia gjeti në banesën e Rozeta Dobitdhe një shumë të konsiderueshme që besohet se është 524.800 euro, 8500 dollarë dhe 368.000 lekë të rinj si dhe aksesorë floriri, që besohet i përkasin pikërisht Klosit. Rreth 500 mijë euro u gjetën të fshehur në tubat e aspiratorit.
Prokuroria e Tiranës dyshon se 500 mijë eurot e gjetura në banesën e Rozeta Dobit janë vjedhur nga dy familjarët Dobi në banesën e Alda Klosit. Pastruesja Rozeta Dobi dhe i biri këmbëngulën në deklaratat e tyre se paratë i përkisnin ish-zyrtares, e cila ia kishte lënë në ruajtje.
Kjo shumë e ka bindur prokurorinë se duhet të hetojë nëse ish-zyrtarja e lartë Klosi po pastronte apo jo para të fituara nga korrupsioni.
Prokuroria e Tiranës ka nisur një hetim pasuror për Alda Klosin, e cila rezulton të mos ketë deklaruar pasurinë dhe të ketë mbajtur para kesh me burim të paidentifikuar. Hetimi pasuror konkludon në verifikimin pronave të luajtshme dhe paluajtshme të saj dhe familjarëve.
Ish-zyrtares i janë sekuestruar një apartament dhe një garazh në pronësi të saj, pasuri këto, që nuk i kishte të deklaruara.
