Kreu i SPAK, Altin Dumani ka raportuar këtë të enjte në Këshillin e Lartë të Prokurorisë lidhur me aktivitetin e Prokurorisë së Posaçme për vitin 2023. Të pranishëm kanë qenë dhe dy zëvendësdrejtuesit e tij Adnand Xholi dhe Klodian Braho dhe drejtuesja e Byrosë Kombëtare të Hetimit Aida Hajnaj.
Gjatë raportimit, Dumani vlerësoi pozitivisht bashkëpunimin me agjensitë partnere, ku tha se ardhja e hetuesve të DEA dhe FBI, të cilët janë atashuar pranë zyrave të SPAK, ka ndihmuar proceset hetimore.
Dumani tha se vlera e pasurive konfiskuara e të sekuestruara mbërrin një vlerë në total prej 41 milion euro për vitin e kaluar, nga të cilat 54 % të sekuestruara, pjesa tjetër të konfiskuara. Ai shtoi se gjatë vitit të shkuar, janë regjistruar 221 procedime penale.
Ndër të tjera, Dumani tha se janë 221 procedime penale për korrupsion, nga të cilët 18 të pandehur për zyrtarë të nivelit të lartë.
“Për 2023 SPAK ka njohur një rritje cilësore, këto të cituara edhe në Progres Raporti i publikuar në nëntor 2023. SPAK ka arritur të krijojë besueshmeri tek autoritetet partnere. Përfaqësues të DEA dhe FBI janë atashuar pranë SPAK. Kemi krijuar kontakt direkt me autoritete të vendeve të Amerikës Latine.
Është vijuar me fuqizimin e laboratorit të ekspertizës, sektori i hetuesve financiarë, duke shtuar edhe burimet njerëzore. Vëmendje e veçantë i është dhënë hetimit të produkteve të veprës penale.
41 milionë euro është vlera e pasurive të sekuestruara e konfiskuara në vitin 2023. Nga të cilat 54% e zënë pasuritë e konfiskuara në vlerën e 22.5 milionë euro dhe 46% të sekuestruara në vlerën 19 milionë euro. Gjithashtu është rritur numri i procedimeve penale të reja 16 % krahasuar me vitin 2022. Rëndësi e madhe për luftën kundër pastrimit të parave. Vendi ka dalë nga lista gri.
Në vitin 2023 janë regjistruar 67 procedime kryesisht, 28 për vepat penale për korrupsion dhe 39 në kuadër të krimit të organizuar. Ka një rritje të hetimeve të nisura kryesisht me 139%. Gjatë 2023 janë ngritur 10 skuadra të reja hetimore. Gjatë vitit 2023 janë regjistruar 299 procedime të reja. 8 procedime penale me 18 të pandehur për zyrtarë të nivelit të lartë, ish ministra, ish-kryeministra, ish-kryebashkiakë, apo ish-sekretarë të përgjithshëm. 201 procedime penale për korrupsionin. 85 procedime për krimin e organizuar 13 procedime për terrorizmin
Gjatë vitit 2023 janë ngritur 10 skuadra të reja të përbashkëta, ndërsa hetimet vijojnë me 25 skuadra të përbashkëta hetimore. Ka një rritje me 95% të kërkesave për ndihmë juridike me jashtë shtetit, kryesisht me Italinë, Francën, vendet nordike, si dhe me vendet e rajonit si Maqedonia e Veriut apo Kosova.” – tha Dumani.
Po ashtu Dumani ngriti shqetësimin se institucionet shtetërore nuk po bashkëpunojnë me SPAK për luftën kundër krimit të organizuar dhe korrupsionit.
“Në lidhje me hetimin e krimit të organizuar SPKA ka ndjekur strategjinë e hetimit shterrues duke synuar shkatërrimin përfundimtar të tyre. Duhet nënvizuar se bashkëpunimi i institucioneve publike në luftën kundër korrupsionit e krimit të organizuar është shqetësues. Nisur nga numri I referimit të veprave penale nga institucionet publike, duke përjashtuar policinë e shtetit ky numër është mjaft i ulët për vitin 2023 me vetëm 12 raste të referuara. Referimi nga këto institucione ka një tendecë të fortë rënie, që shkon deri në 40% krahasuar me vitin 2022. SPAK ka mbajtur të njëjtën qasje në 3 vitet e fundit” – tha kreu i SPAK.