Mali i Zi është goditur nga një tërmet i fortë mesditën e kësaj të mërkure.
Sipas Qendrës Sizmologjike Evropiane-Mesdhetare (EMSC), tërmeti ka qenë me magnitudë 4.7 e shkallës Rihter, teksa është regjistruar në orën 12:40 me orën lokale. Sipas mediave të huaja, epiqendra e tërmetit ishte 32 kilometra në veriperëndim të Nikshiqit, në një thellësi prej dhjetë kilometrash.
Disa persona kanë shkruar në rrjetet sociale se kanë ndier dridhje të tokës edhe në Bosnje e Hercegovinë dhe Serbi. Qendra Sizmologjike Evropiane-Mesdhetare thotë se epiqendra e tërmetit ishte 28 kilometra në verilindje të Bileças në Bosnje dhe 80 kilometra në juglindje të Mostarit.
Zona përreth komunës së Nikshiqit, qytetit të dytë më të madh në Mal të Zi që ndodhet në perëndim të shtetit, po ashtu u godit të martën në mbrëmje nga një tërmet prej 4.3 ballësh.
