Një plagosje me armë zjarri ndodhi në aksin Shkodër-Velipojë mbrëmjen e djeshme në vendin e quajtur Ura e Gjo Lulit.
I plagosur ka mbetur shtetasi Emiljano Paloka, 27 vjeç, banues në fshatin Pulaj në Velipojë.
Sipas burimeve, 27-vjeçari ndodhej brenda automjetit bashkë me dy shokë të tij dhe plagosja ka ndodhur brenda në makinë, ku është gjetur edhe gëzhoja e armës së zjarrit.
Nga hetimet e para dyshohet se plagosja e shtetasit Emiljano Paloka ka ndodhur padashje nga një prej shokëve të tij, në një shkrepje të pavetëdijshme të armës në lojë e sipër brenda automjetit.
Pas plagosjes, menjëherë 27-vjeçari është transportuar drejt spitalit të Shkodrës nga dy shokët e tij, dhe pasi e kanë lënë në urgjencë, janë larguar në drejtim të paditur. Policia ka identifikuar këta dy shtetas dhe po punon për gjetjen e tyre lidhur me këtë ngjarje.
