Tirana vijon të zhgënjejë tifozët dhe veten e saj duke u mposhtur nga Kukësi në ndeshjen e parë të gjysmëfinales së Kupës.
Bardheblutë humbasin 2-0 duke e bërë shumë të vështirë kualifikimin në finale.
Trajneri Erbim Fagu u shpreh pas ndeshjes se do të provojnë gjithçka për ta përmbysur rezultatin në shtëpi, ndërsa evidentoi repartin e mbrojtjes aty ku skuadra po has më së shumti vështirësi.
“Sigurisht e kishim vlerësuar se është trofe për t’u fituar, i dyti nga rëndësia në vend.
Ajo që nuk shkoi, përveç dy momenteve të golit që nuk ishim të kujdesshëm, mendoj se gjatë gjithë kohës kishim lojën në kontroll, por nuk ishim të qartë në momentet e fundit në konkludimin e aksioneve.
Vuajtëm se edhe trysnia e rezultatit të fut në presion sidomos në treçerekun e fushës. Por siç e thashë, më pëlqeu mënyra se si luajtëm sot, më vjen keq që pësojmë gola shumë të thjeshtë. Ky është meraku i vetëm. Por gjithsesi kemi ndeshje kthimi që do bëjmë gjithçka për ta fituar.
A mund ta kthejmë? Sigurisht që po, që e mendoj të mundshme. Nëse vazhdojmë të luajmë sixç luajtëm sot, duke minimizuar gabimet, çdo gjë është e mundur
Ne do punojmë padyshim për të rritur moralin nga ana psikologjike se dihet që kampionati është i rëndësishëm. Kemi ndeshje direkte me një kundërshtar para nesh. Kemi lojtarë me eksperiencë, të përqendrohemi që të kalojmë ndeshjen me Skënderbeun”, tha Fagu për “MCN” pas ndeshjes.
