Eksperti i aksidenteve rrugore, Gëzim Hoxha ka folur rreth aksidentit tronditës të regjistruar në orët e para të mëngjesit të djeshëm në aksin Këlcyrë-Përmet, ku automjeti “Mercedes Benz” me drejtues Edison Bregaj dhe 7 klandestinë brenda, doli nga rruga dhe përfundoi mbi lumin Vjosë, ku humbën jetën të 8 personat.
Në një lidhje skype për Ora News, Gëzim Hoxha tha se shkaku i aksidentit ka qenë paniku që përfshiu drejtuesin e mjetit, teksa sipas tij ky aksident ka shumë dilema. Sipas tij, Policia ka gabuar rëndë, nëse është vënë në ndjekje të mjetit që po iktye me shpejtësi, pasi sipas tij, ka mënyra të tjera për ta ndaluar.
“Aty ka nevojë që të analizohet fakti se përse ky drejtues mjeti u përfshi në panik, pra kjo kërkon analizën e një psikologu. Pasi një njeri që përfshihet në panik ka të bëjë me një frikë shumë të madhe të tij që ka këtë lloj pasoje. Problemi qëndron në faktin se drejtuesi i mjetit ishte tashmë i përfshirë në një vepër penale, që është trafiku i paligjshëm i emigrantëve dhe ndaj ai është trembur, sepse ka pasur parasysh pasojat që i vinin mbrapa kësaj vepre penale. Nëse policia po i ndiqte nga mbrapa, kjo është shumë e gabuar, sepse ata kanë mësuar dhe janë trajnuar që në një garë makinash nuk ke pse ta ndjekësh, pasi ka vend tjetër për t’i kapur. Pra, kjo duhet parë në këndvështrimin human. Pra, aksidenti në fjalë është i mbushur me shumë dilema, dhe ende nuk dihen shkaqet e vërteta se pse mjeti doli nga rruga”, u shpreh ndër të tjera eksperti i aksidenteve rrugore, Gëzim Hoxha.
