Bukurshkrimi është kthyer në vëmendje në shumë shkolla në Amerikë. Ndërsa teknologjia avancon dhe shumë klasa po përdorin gjerësisht tabletat dhe kompjuterat, në SHBA, një numër në rritje shtetesh kërkojnë ta sanksionojnë me ligj mësimin e shkrimit të dorës nëpër shkolla. Në Kaliforni kaloi së fundmi një ligj që detyron të gjitha shkollat në këtë shtet, nga klasa e parë deri në të gjashtën, që të mësojnë lëndët me shkrim dore. 20 shtete të tjera pritet të ndjekin këtë shembull.
“Pavarësisht se jemi një vend me shumë ndasi, ku kemi kundërshti për shumë çështje, ligji për mësimin me shkrim dore nëpër shkolla mori mbështetje dypartiake dhe të gjithë ranë dakord për rëndësinë e bukurshkrimit. Unë kam qenë mësuese në ciklin fillor për 25 vjet dhe mund të thëm se prej vitesh tashmë, teknologjia ka zënë pjesën kryesore të kurrikulave, ndërsa fëmijët thjesht ulen përpara ekraneve. Bukurshkrimi ndërkohë është një mjet i rëndësishëm gjuhësor dhe artistik, gjë që ma ka mësuar profesioni i mësueses.”, tha Sharon Kuirk-Silva, kongresmene amerikane.
Kjo çështje u rihap në SHBA pas konkursit të 33-të Federal të Bukurshkrimit, ku morën pjesë 80,000 nxënës nga e gjithë Amerika në garë.
Mbështetësit e tezës se bukurshkrimi është i rëndësishëm në zhvillimin konjitiv të fëmijëve sjellin në vëmendje studime të ndryshme se të shkruarit me stilolaps në letër përmirëson kujtesën, meson më mirë lëndën përkatëse dhe e kupton, po ashtu zhvillon aftësitë motorike të fëmijëve dhe të të rriturve.
“Në një studim të vitit 2016, 20 fëmijëve iu kërkua të shkruanin shkronja, ndërsa të tjerëve iu kërkua të shtypnin një buton në tastierë. Aktiviteti i trurit të fëmijëve u analizua për të vlerësuar lidhjen e zonave të ndryshme të tij. Zbuluam se lidhja ishte më e fortë tek fëmijët që shkruanin me dorë sesa tek ata që shtypnin butonat në tastierë.”, tha psikologia Sofia Vinçi-Buher.
Edhe nëpër studime të tjera të kryera në Tokio dhe në Norvegji, përfundimet e kanë qenë se shkruarit me dorë kërkonte komunikim midis pjesëve të ndryshme të trurit duke aktivizuar shqisat dhe aftësitë motorike të trurit.
