Deputetët i pret një axhendë e ngjeshur parlamentare këtë javë me plot çështje të mbetura pezull, pas javës së gjelbër.
Një ndër çështjet e mbetura pezull është edhe votimi i amnistisë penale, e cila kërkon 84 vota në Kuvend, por që ka mbetur “peng” për shkak të kërkesës së mazhorancës, e cila kërkon të falë zyrtarët dhe politikanët e korruptuar.
Ndonëse asnjë prej palëve nuk e ka pranuar publikisht arritjen e një dakordësie përfundimtare, me rikthimin e normalitetit në Kuvend dhe tërheqjes së mazhorancës nga amendamenti që do të ulte dënimin për ish-zyrtarët e korruptuar, asgjë nuk e pengon votimin e këtij projektligji.
Ndërkohë, komisioni hetimor parlamentar për koncesionet në shëndetësi (sterilizimin dhe check up-in), do të zhvillojë të martën e 2 prillit mbledhjen e dytë për të dakordësuar ekspertët që do të ndihmojnë hetimin parlamemtar.
Ndërsa komisioni hetimor për rrjedhjen e të dhënave nga sistemi TIMS, i cili do të drejtohet nga , deputeti demokrat Ervin Salianji pritet të nisë punën këtë javë, fillimisht me konstituimin e komisionit dhe miratimin e një plani të qartë pune. Nënkryetari i komisionit nga ana e mazhorancës do të jetë Tonin Gogu.
Nga sirtaret e kuvendit do të dalë edhe kërkesa më e fundit e mazhorancës për ngritjen e një komisioni të posaçëm parlamentar për të luftuar dezinformimin dhe ndërhyrjen e vendev të huaja në proceset demokratike në Shqipëri.
Socialistët, përmes një kërkese të depozituar nga grupi parlamentar, kërkojnë që përmes këtij komisioni të adresohen disa fenomene shqetësuese si fushatat e dezinformimit në mediat tradicionale dhe sociale për të ndikuar në opinionin publik, mbështetjen financiare të drejtpërdrejtë dhe të tërthortë për përpjekjet për dezinformim, shantazhimin ekonomik të aktorëve publikë dhe manipulimin e shoqërisë civile.
Kërkesa e tyre do të kalojë fillimisht në të gjitha hallkat parlamentare për ngritjen e këtij komisioni, përbërjen e anëtarëve apo edhe objektin e qartë të veprimtarisë, që priten të diskutohen në konferencën e kryetarëve të mërkurën e 3 prillit.
Konfereca e kryetarëve, pritet të vendosë edhe për kalimin sërish në parlament të 5 projekt-ligjeve të anulluara nga sekretariati për Procedurat dhe Votimin për shkak të votimit pa kuorum në seancën plenare të 7 marsit.
Në mbledhjen e mbajtur të premten, sekretariati me 4 vota pro, miratoi kërkesën e Partisë Demokratike për anulimin e votimit të këtyre ligjeve, mes të cilave edhe ligji për investimet strategjike, dhe kalimin sërish për miratim në një prej seancave të ardhshme.
