Viti 2023 vlerësohet më fatali për emigrantët që përpiqen të hyjnë ilegalisht në Europë, duke thyer rekorde me 8 mijë e 541 viktima. Gati 60 për qind e vdekjeve ishin emigrantë që janë mbytur në det.
Organizata Botërore për Migracionin ka njoftuar se tëndencat janë po aq alarmante edhe për vitin 2024 deri tani.
Teksa mbërritjet me sukses janë dukshëm më të ulëta (16 mijë e 818 emigrantë) krahasuar me të njëjtën periudhë të vitit të shkuar (26 mijë e 984 emigrantë), numri i vdekjeve është pothuajse aq i lartë sa më parë, me 956 të regjistruar që nga 1 janari.
Gjithashtu numri i vdekjeve të paidentifikuara mbetet i lartë, me 2 në 3 emigrantë të paidentifikuar, duke i lënë familjet dhe komunitetet të përballen me mungesën e qartësisë për atë që i ndodhi një miku apo të afërmi.
Të dhënat e Projektit të Migrantëve të Zhdukur të agjencisë së OKB-së tregojnë se trupat e 26 mijë e 666 personave që vdiqën gjatë migrimit nuk janë gjetur.
Zyrtarët e Organizatës së Migracionit pohuan se pavarësisht mungesës së këtyre identifikimeve, vlerësohet se pothuajse 5 mijë e 500 gra kanë humbur jetën në rrugët e migrimit gjatë 10 viteve të fundit ndërsa fëmijë të identifikuar janë gati 3 mijë e 500, por nuk përjashtohet mundësia për një numër më të lartë
Emigrantët vijnë nga vende në konflikt zbulon studimi, duke nënvizuar rreziqet me të cilat përballen ata që përpiqen të ikin pa rrugë të sigurta.
Rruga më vdekjeprurëse mbeten ujërat e Mesdheut Qendror , ku të paktën 23 mijë e 92 njerëz kanë vdekur gjatë kësaj dekade.
