Një 46-vjeçar është arrestuar nga Policia në Himarë, pasi akuzohet për grabitje.
Në pranga ka rënë shtetasi Shpëtim Suga, i cili është kapur duke vjedhur disa pajisje elektroshtëpiake në banesën e një tjetër shtetasi në Himarë.
Policia njofton se në furgonin e 46-vjeçarit janë gjetur edhe disa vegla dhe produkte ushqimore që po ashtu dyshohen të vjedhura.
“Gjatë kontrollit në automjetin furgon që 46-vjeçari përdorte për të kryer vjedhjet, shërbimet e Policisë gjetën një shumë parash dhe disa produkte ushqimore që ky shtetas dyshohet se i ka vjedhur në banesën e shtetasit K. Ll.
Gjithashtu, në cilësinë e provës materiale u sekuestruan vegla të ndryshme pune të cilat dyshohet se 46-vjeçari i ka vjedhur në një banesë, në Himarë, më datë 24.01.2024, bashkë me disa pajisje elektroshtëpiake”,- njofton Policia.
Vijojnë hetimet për dokumentimin e vjedhjeve të tjera që mund të ketë kryer ky shtetas.
