Efektivi i policisë në Shkodër, Admir Okaj, i cili u godit me sende të forta në kokë, e për pasojë përfundoi në spital, ku mori mjekim, ishte jashtë orarit të shërbimit.
Bëhet me dije se efektivi është konfliktuar me fqinjin e tij, Ormir Gucia.
Shkak dyshohet se ka qenë një konflikt i çastit. Sipas njoftimit të policisë, në momentin e sherrit ka pasur shkrepje të armës së zjarrit teksa po sipas njoftimit të bluve ka qenë e pavullnetshme dhe pa shkaktuar dëmtime.
Efektiv Oka, pasi ka marrë mjekim në spital, ka shkuar në komisariat për të dhënë dëshminë e tij në lidhje me ngjarjen.
Njoftimi i policisë:
Shkodër/Informacion paraprak
Rreth orës 15:45, dyshohet se gjatë një konflikti të çastit, për motive të dobëta, shtetasi O. G., 47 vjeç, ka dëmtuar në kokë, me sende të forta, shtetasin A. O., 49 vjeç, banues në Shkodër (punonjës policie, jashtë shërbimit), i cili po merr mjekim në spitalin rajonal të Shkodrës dhe është jashtë rrezikut për jetën.
Gjatë konfliktit dyshohet se arma e shërbimit e punonjësit të Policisë është shkrepur në mënyrë të pavullnetshme, por pa shkaktuar dëmtime.
Shërbimet e Policisë, me marrjen e njoftimit, shkuan menjëherë në vendin e ngjarjes dhe vijojnë krehjen e zonës, për kapjen e 47-vjeçarit.
Grupi hetimor, në drejtimin e Prokurorisë, vijon punën për sqarimin e plotë të rrethanave të ngjarjes.
Ndërkohë, në lidhje me këtë ngjarje, po kryen veprime edhe AMP, për të zbardhur rrethanat e përdorimit ose jo të armës së zjarrit, si dhe për të përcaktuar nëse shkrepja e armës ka qenë e pavullnetshme.
