Armando Broja u rikthye pas një viti e gjysmë te kombëtarja e Shqipërisë.
Sulmuesi i Fulhamit në Premier League, foli për “KUQ E ZI” në SuperSport 2 pas miqësores së humbur me Kilin.
Fillimisht theksoi se nuk kanë luajtur aq fort, sa kundërshtarët gjatë kësaj sfide e më tej u shpreh se gjërat e mëdha do të vijnë në verë, e thënë ndryshe gjatë Kampionatit Evropian të futbollit.
Broja gjithashtu pranoi se për të arritur formën e dëshiruar sportive i duhen minuta në këmbë çka i kanë munguar në Londër me Fulham.
Çfarë nuk shkoi? Ishim pak pa fat sot. Me thënë të drejtën, nuk kemi luajtur mirë. Kili luajti më fort. Jemi të bashkuar si ekip, kemi dhe dy muaj kohë për Europianin. E dimë që nuk janë vetëm miqësore, kemi edhe Suedinë përpara. E dimë që miqësoret janë të vështira. Po përgatitemi që të jemi me Europianin.
Mua më kënaqi rikthimi pas një vit e gjysmë. Tifozët më kënaqen, u kënaqa me ta dhe me veten. Jam në një moment që jam pa formë. Jam rikuperuar pas një dëmtimi të rëndë. Më duhen minuta që të bëhem gati, por gjithçka po shkon mirë për mua me kalimin e kohës.
Sot humbëm, por gjërat e mëdha do të vijnë në verë. Gjithmonë kam luajtur pa presion, që kur isha i vogël. Për mua është e rëndësishme të rikuperohem mirë.
Nuk kam luajtur më parë me këtë trajner dhe këtë staf. Është gjë e bukur që po kuptohemi me trajnerin, stafin dhe shokët e skuadrës. E përsëris: gjërat e mëdha do të vijnë në verë.
Unë në 100% të formës? Nuk e di, por ndihem mirë fizikisht, ndihem mirë me trupin tim. Po stërvitem mirë dhe po ndihem gjithnjë e më mirë. Po kuptohem me trajnerin dhe shokët. Shoh nga e ardhmja, dua ta harroj dëmtimin. Kam shumë cilësi për t’i përdorurur në të ardhmen”, theksoi 22-vjeçari shqiptar.
