Sërish telashe me drejtësinë për kryebashkiakun socialist të Rrogozhinës, Edison Memolla.
Burime pranë Prokurorisë së Posaçme thanë se është çelur një procedim i ri penal për veprën penale “Pastrim të produkteve të veprës penale” , pas një dosje të administruar nga autoritetet ligjzbatuese italiane, që ka në qendër disa transaksione monetare të dyshimta.
Burime flasim për transaksione të dyshimta me një shumë totale rreth 1 milion euro nga një kompani ndërtimi me seli qendrore në Umbria të Italisë, që ka lidhje me familjarë të Edison Memollës.
Në materialin e administruar nga SPAK, pala italiane kërkon që autoritete shqiptare të verifikojnë pasuritë e Memollës dhe lidhjet e tij me transferuat monetare.
Përveç kësaj çështjeje, mësohet se Prokuroria e Posaçme ka regjistruar një tjetër kallëzim penal për “Shpërdorim detyre” dhe “Korrupsion aktiv”, ku i dyshuari kryesor është kryetari i Bashkisë Rrogozhinë.
Kallëzimi penal është depozituar në SPAK nga Partia Demokratike, ku veç Memollës, ndjekje penale është kërkuar dhe për disa nga anëtarët e komisioneve të vlerësimit të dëmeve ekonomike të shkaktuara në banesa nga tërmeti i 2019.
Ka dyshime se Memolla ka dëmshpërblyer të afërm të tij në vlera të konsiderueshme, si dhe ka dhënë dëmshpërblime dy herë për të njëjta banesë të dëmtuara nga tërmeti.
Aktualisht, Memolla është në gjykim në gjendje të lirë për akuzën e korrupsionit aktiv në zgjedhje, kryer në bashkëpunim.
Hetimet për çështjen nisën pas publikimit në media të një audio-përgjimi bërë në prag të zgjedhjeve të pjesshme të 6 marsit 2022. Në material, Memolla dëgjohet duke ndërhyrë tek një elektricist i OSHEE-së për të mos i ndërprerë energjinë elektrike një familjeje të varfër, me qëllim që tu marrë votën.
