Incidenti që ndodhi një ditë më parë mes Kryeministrit Edi Rama dhe gazetares së Syri Tv, Ambrozia Meta, përpos reagimeve të shumta në opinionin shqiptar, ka tërhequr edhe vëmendjen e mediave të huaja.
Së fundmi ka qënë gazeta italiane La Stampa, që i ka kushtuar një artikull rastit. Media italiane e ka cilësuar veprimin e kreut të qeverisë si të pamatur dhe aspak të hijshëm. Mes të tjerash shkruhet se ky incident ndez një stuhi polemikash në vend, dhe krijon akuza të mëtejshme për raundin e investimeve dhe favorizimin e mundshëm ndaj pasardhësve të dinastisë së pasurive të paluajtshme Kushner, bashkëshortit të Ivanka Trump.
Kujtojmë se e gjithë skena u regjistrua paraditen e së martës ku Rama preku në fytyrë gazetaren Ambrozia Meta, teksa kjo e fundit kërkoi informacione mbi një projekt investimin e lidhur me dhëndrin e Donald Trump, Jared Kushner, në ishullin e Sazanit.
Teksa Rama foli për të mirat, sipas tij, të projektit të Portit të Durrësit, gazetarja Meta i tha se “aty nuk ka investim, por po shiten pallatet në gropë”.
“Shko shifi”, i përgjigjet Rama, teksa zgjat dorën e djathtë në fytyrën e gazetares dhe e shtyn, duke u larguar.
“Ju lutem mos më prekni më”, i drejtohet gazetarja Ambrozia Meta.
Në këtë mënyre, u mbyll prononcimi me gazetarët.
Sakaq kujtojmë se kryeministri Rama reagoi fill pas ngjarjes, dhe refuzoi të kërkonte falje, duke e cilësuar si një agresion imagjinar.
