Nga Boldnews.al
Pas atentatit të 15 Marsit, ku mbeti i vrarë Gentjan Bejtja, forcat e specializuara policore “Shqiponja”, mësyn në fshatin Larushkë dhe në zonën e Fushë-Krujës për të gjetur autorët. Deri më tani, ende nuk ka asnjë gjurmë të autorëve. Por, “Shqiponjat” e Muhamet Rrumbullakut nuk kanë dalë duarbosh.
Në një operacion të mirëkoordinuar dhe në bashkëpunim me forcat e Komisariatit të Krujës, reparti special “Shqiponja” ka kapur…3 mijë fara kanabisi. Ky zbulim është më mirë se sa pa gjë fare, pasi struktura e specializuar duhet të justifikojë ditën e punës.
Në një njoftim të shpërndarë nga Policia e Shtetit këtë të Martë, thuhet se: Shërbimet e Sektorit të Forcës së Posaçme “Shqiponja” dhe shërbimet e Komisariatit të Policisë Krujë, si rezultat i administrimit të shpejtë të informacioneve nga inteligjenca policore, të siguruara në vijim të megaoperacioneve “Tempulli 2”, dhe “Sundimi i ligjit”, për një shtetas që transportonte fara kanabisi dhe posedonte sende të kundërligjshme, kanë organizuar dhe finalizuar operacionin policor të koduar “Seeds”. Si rezultat i operacionit u arrestua në flagrancë shtetasi G. D., 26 vjeç, banues në Krujë.
Gjatë kontrollit në automjetin që ky shtetas drejtonte, shërbimet e Policisë gjetën dhe sekuestruan rreth 3000 fara të dyshuara narkotike cannabis sativa, 4 maska si ato që përdoren për ngjarje kriminale, 1 kamera ambientale, sasi municioni luftarak dhe 3 celularë”.
Megjithëse njoftimi i Policisë kërkon më shumë kohë të lexohet se sa koha që do të qëndrojë në paraburgim i arrestuari, uniformat blu kanë vendosur ta publikojnë këtë rast paligjshmërie, ndoshta me shpresën se do të qetësojnë me praninë e tyre banorët e Krujës dhe Fushë-Krujë, të cilët tmerrohen periodikisht nga atentate të përgjakshme dhe me autorë gjithnjë në arrati.
Në të gjitha këto ngjarje të rënda, Policia është e pranishme rregullisht për të mbledhur gëzonjat dhe, fatkeqësisht, për të bërë bilancin e viktimave.
Gentian Bejtja, një personazh i njohur i kronikës policore, u vra në një attentat pasditen e 15 marsit, në oborrin e shtëpisë së tij. Deri më tani, autoritetet policore kanë qenë në gjendje që të rindërtojnë skenën e krimit, por ende nuk kanë rënë në gjurmët e autorëve.
Viktima ka qenë edhe tre herë të tjerë shënjestër e atentateve, të cilat kanë dështuar për ta vrarë atë, por në një rast i morën jetën kunatit të tij, Ramazan Sino, një djalë i ri që nuk kishte aspak lidhje me aktivitetet e paligjshme të Gentian Bejtas.
Policia ishte në dijeni të plotë se Bejta ishte vendosur në plan për t’u vrarë. Por, siç rezultoi, nuk është marrë asnjë masë për të shmangur atentatin dhe tragjedi të tjera të mundshme, pasi shënjestra u vra brenda shtëpisë së tij.
Për të mbuluar dështimin me ngjarjet e rënda kriminale, “Shqiponjat” dhe pjesa tjetër e Policisë së Shtetit bëjnë “show” me zbulimin e farave të kanabisit.
