Kuqezinjtë e Sylvinhos kanë zbritur pasditen e sotme në ambientet e Shtëpisë së Futbollit në Tiranë, për seancën e parë stërvitore në kuadër të dy miqësoreve të marsit, ndaj Kilit e Suedisë (22 dhe 25 mars), që janë edhe ndeshjet e para të Kombëtares Shqiptare për vitin 2024.
Në fushë pasditen e të hënës mungonte Qazim Laçi, i cili ishte në udhëtim nga Praga drejt Tiranës dhe nuk arriti dot në kohë.
Në limite mbërriti edhe Nedim Bajrami, që zbarkoi në qendrën stërvitore të kombëtares në kohën kur shokët po zbrisnin në fushë, teksa u bashkua me ta disa minuta më vonë për një seancë të lehtë.
Mungonte gjithashtu edhe Naser Aliji, që luan pasditen e të hënës me skuadrën e tij, rumunen Vountari dhe më pas do të fluturojë drejt Tiranës, për t’u vënë në dispozicion të Sylvinhos dhe stafit të tij nga dita e martë.
Në seancën e parë stërvitore, Sylvinho mori edhe disa futbollistë nga Shqipëria U21 e Alban Bushit, duke qenë se futbollistët që luajtën të dielën me skuadrat e tyre, u lanë të kryejnë një seancë shkrydhëse, pa ngarkesën e zakonshme fizike.
Lista e Kombëtares për 2 ndeshjet miqësore:
