Emisioni “Review” ka rindërtuar skemën e vrasjes së ish-policit të burgjeve, Gentjan Bejtja, 42-vjeçarit që u ekzekutua dy ditë më parë në banesën e tij në fshatin Larushkë të Fushë-Krujës.
Siç shihet dhe nga skema, 4 persona dyshohet se kanë qenë autorët e ekzekutimit të ish-policit të burgjeve.
Me automjetin tip ‘Land Rover’ fuoristradë ngjyrë e bardhë ata kanë ardhur nga zona e Fushë-Krujës në drejtim të fshatit Larushk.
Rreth orës 16:20 minuta autorët janë futur në rrugicën ku ndodhet banesa e Gentjan Bejtjës. Mjetin e kanë afruar deri në afërsi të portës kryesore dhe dyshohet se 3 persona të maskuar dhe me veshje të zeza kanë zbritur nga makina, ndërsa personi tjetër i ka pritur në makinë.
Porta kryesore ka qenë e hapur dhe një gjë e tillë i ka ndihmuar autorët të futen direkt në oborr. Policia në vendin e ngjarjes ka gjetur rreth 50 gëzhoja kallashnikovi. Objektivi ka qenë në pjesën e pasme të shtëpisë kur është qëlluar me breshëri kallashnikovi.
Autorët pasi kanë qëlluar në drejtim të 43-vjeçarit kanë lëvizur në drejtim të fshatit Hasan vetëm pak metra vendit të ngjarjes dhe kanë djegur makinën me 4 kallashnikovë brenda. Dyshohet se aty janë pritur nga një tjetër mjet i cili i ka larguar nga zona.
