Qindra persona u mblodhën të premten e 15 marsit në qendër të Meksiko Sitit për të festuar Ditën Botërore të Gjumit. Të shtrirë mbi tapetë, me kokat mbi jastëkë dhe sytë e mbuluar me maska, pjesëmarrësit lanë pas kaosin e kryeqytetit meksikan për atë që organizatorët e quajtën një demonstratë të paqtë për të drejtën për të fjetur.
“Idea është që duke organizuar një akivitet të tillë t’iu hapim rrugë politikave të reja publike për promovimin e të pushuarit. Kemi ditë të gjata pune, por në mjediset e punës nuk ka ndonjë vend ku mund të merret një sy gjumë apo thjesht të bësh një pushim të shkurtër” u shpreh Guadalupe Teran, doktoreshë e qendrës për gjumin dhe neuroshkencën që organizoi aktivitetin së bashku me qeverinë meksikane.
Falë një sesioni meditimi, disa nga pjesëmarrësit ranë në gjumë të thellë, ndërsa të tjerë ia dolën të qetësoheshin për pak momente. Sipas studimve, gati gjysma e meksikanëve kanë problem me gjumin. Sipas një raporti të 2019-ës së Organizatës për Bashkëpunim Ekonomik dhe Zhvillim, Meksika ishte vendi ku punohej më shumë në botë. Vitin e shkuar, kongresi i vendit debatoi për një reformë për të ulur orët javore të punës nga 48 në 40. Debati ndërkohë ende vijon.
