Policia e Shkodrës ka bllokuar makinën e blinduar të Safet Bajrit.
Bajri, i cili udhëtonte me automjet të blinduar, është shoqëruar në ambientet e Policisë së Shkodrës, për verifikimet përkatëse.
Përmes një njoftimi, Policia bën të ditur se pas verifikimeve, rezultoi se ai nuk ishte i pajisur me autorizim të lëshuar nga organi kompetent për përdorimin e një automjeti të blinduar.
Drejtuesit të automjetit, Safet Bajri, sipas policisë, iu vendos gjobë dhe u zbatua masa për bllokimin e automjetit tip “Mercedes Benz” dhe do nisin procedurat e konfiskimit.
“Shërbimet e Policisë, gjatë zbatimit të planit të masave për parandalimin e kriminalitetit dhe për goditjen e paligjshmërive, në qytetin e Shkodrës, shoqëruan në ambientet e DVP Shkodër, një automjet të blinduar. Pas verifikimeve rezultoi se drejtuesi i automjetit, shtetasi S. B. alias S. R., banues në fshatin Dobraç, Shkodër, qarkullonte i papajisur me autorizim të lëshuar nga organi kompetent. Drejtuesit të automjetit iu vendos masë administrative, konform Kodit Rrugor, si dhe u zbatua masa plotësuese për bllokimin e automjetit tip “Mercedes Benz” dhe do nisin procedurat e konfiskimit“, njoftoi policia.
