Kreu i Prokurorisë së Posaçme, Altin Dumani ka deklaruar se nuk e shqetësojnë kërcënimet nga politika, por nga krimi i organizuar. Sipas tij, familja e një prokurori të SPAK është kërcënuar nga krimi i organizuar.
Pas kësaj, ka ardhur edhe ironia e gazetarit Klodian Tomorri i cili e cilëson si një deklaratë pa kuptim.
Tomorri shkruan se SPAK i ka të gjithë instrumentet, mekanizmat dhe fuqinë ligjore për të “ngritur në ajër” këdo që e çon nëpër mend të kërcënojë prokurorët. Madje në raste të tilla çdo gjë bëhet në diskrecion, pa shpallje apo deklarime publike derisa shmanget plotësisht rreziku.
Tomorri pyet me ironi se ç’duhet të thonë gazetarët që po kërcënohen në seri me emaile, po shantazhohen me shkrime dhe çdo lloj forme, ndërkohë që as policia, as prokuroria nuk vepron. Ai shton më tej se gazetaret s’kanë as policë që i ruajnë, as pistoleta, as fuqi për të arrestuar njerëz.
“Drejtuesi i SPAK ka deklaruar sot se familja e një prokurori është kërcënuar nga krimi i organizuar.
Kreu i një organi special dhe kaq të fuqishëm sa SPAK mund ta bëjë këtë deklaratë publikisht vetëm në një rast. Kur ai gjykon se qeveria dhe shteti nuk po i ofrojnë mbrojtjen e duhur prokurorëve. A është ky rasti? Zoti Dumani nuk e tha këtë, madje u kujdes të theksonte qe politika nuk ka gisht.
Në këtë rast kjo duket si deklaratë pa kuptim. Aq më tepër pastaj ato tonet vetëmohuese, që ne jemi përgatitur edhe të mos kthehemi me.
SPAK i ka të gjithë instrumentet, mekanizmat dhe fuqinë ligjore për të ngritur në ajër këdo që e çon nëpër mend të kërcënojë prokurorët. Madje në raste të tilla çdo gjë bëhet në diskrecion, pa shpallje apo deklarime publike derisa shmanget plotësisht rreziku.
Ça duhet të thonë gazetarët pastaj, që po kërcënohen në seri me emaile, po shantazhohen me shkrime dhe çdo lloj forme, ndërkohë që as policia, as prokuroria nuk vepron. Gazetaret s’kanë as policë që i ruajnë, as pistoleta, as fuqi për të arrestuar njerëz.
Merrini ngrijini zgupthi kush kërcënon prokuroret. Deklaratat publike nuk shërbejnë për asgjë në këtë rast. Në mos prishin më shumë punë,” shkruan gazetari.
