Një i ri është qëlluar për vdekje me thikë rreth mesditës së kësaj të hëne në qendër të Fierit, në vazhdën e një konflikti. Viktima është 19-vjeçari Grei Bihuci.
Si autor i vrasjes është arrestuar 18-vjeçar Florjan Muka. Një tjetër person, i cili dyshohet se ka ndërhyrë për të shuar sherrin, ka mbetur i lënduar.
Konflikti mes të rinjve, siç bëjnë me dije burime policore, dyshohet se ka nisur në rrjetet sociale.
Ngjarja
Ngjarja ndodhi rreth orës 11:30, në bulevardin “Jakov Xoxa”. Burime zyrtare nga policia lokale konfirmuan se Florjan Muka, gjatë një konflikti për motive të dobëta, plagosi me thikë Bihucin. Ky i fundit u dërgua në spitalin rajonal. Por, si pasojë e plagëve të marra nuk mundi të mbijetojë dhe humbi jetën në spitalin e Fierit.
Në spital, u paraqitur për ndihmë mjekësore edhe 20-vjeçari Olti Serjanaj, i cili po merr mjekim. I riu i cili mendohet të jetë shok me viktimën, sipas bluve, në momentin që ka ndërhyrë për të parandaluar përshkallëzimin e konfliktit, është dëmtuar. Sipas bluzave të bardha, 20-vjeçari ndodhet jashtë rrezikut për jetën.
Ndërkohë, blutë kanë arrestuar autorin e dyshuar të vrasjes, Florjan Muka. Me të riun “po kryhen veprimet e mëtejshme procedurale”, njoftoi policia, që shton se “grupi hetimor nën drejtimin e Prokurorisë po punon për sqarimin e rrethanave dhe dokumentimin ligjor të rastit”.
Në njoftimin paraprak për ngjarjen, blutë e Fierit thonë se sherri mes të rinjve ka ndodhur për “motive të dobëta”, ndërsa burime saktësojnë se ka dyshime që konflikti mes palëve të ketë lindur në rrjetet sociale.
Sipas të njëjtave burime, autori i kishte bërë “like” në rrjetet sociale të dashurës së viktimës dhe kjo e hënë ishte caktuar dita e sqarimit mes dy të rinjve. Takim që përfundoi me vrasjen me thikë të 19-vjeçarit Grei Bihuci.
