Është ekstraduar nga Gjermania në atdhe 34-vjeçari Abedin Bacja nga Fieri. Ai është dënuar me 5 vjet burgim, nga Gjykata e Durrësit, për veprën penale “Heqja e paligjshme e lirisë”.
Autoritetet policore raportojnë se në vitin 2013, Abedin Bacja bashkë me dy shtetas të tjerë, kanë marrë me forcë, në automjet, shtetasin A. Xh.. Më pas kanë telefonuar babanë e tij, të cilin e kanë kanosur për jetën e shtetasit A. Xh., nëse nuk iu jepte shumën 7500 euro.
Ndërkohë, Policia bën me dije se është ekstraduar nga Mbretëria e Bashkuar në Shqipëri dhe shtetasi R. M., 43 vjeç, lindur në Mat.
Sipas autoriteteve, gjykata e Matit, në vitin 2021, i ka caktuar masën e sigurisë “Arrest në burg”, për veprat penale “Dhuna në familje” dhe “Shkatërrimi i pronës”. Në vitin 2021, 43-vjeçari ka goditur në kokë dhe në trup, me send të fortë (levë hekuri), kunatin e tij, dhe i ka dëmtuar automjetin.
Këto ekstradime u kryen pas bashkëpunimit ndërmjet zyrave të Interpolit në Tiranë, Wiesbaden dhe Manchester.
