Vllaznia u kualifikua në gjysmëfinalet e Kupës së Shqipërisë, pasi humbi ndeshjen e parë 2-1 dhe fitoi të dytën 6-1 ndaj Erzenit, megjithatë të dy këto takime kanë pasur jo pak kosto për shkodranët.
Kjo pasi në transfertën e parë në Rrogozhinë, u dëmtua portieri titullar Kristi Qarri, që pati probleme në shpatull dhe aktualisht është në fazë rikuperimi.
Tri ndeshjet e fundit mes shtyllave u aktivizua titullar Jurgen Mëhidri, por edhe ky rezultoi i pafat, pasi pësoi një tërheqje muskulore pikërisht ndaj Erzenit në takimin e kthimit, duke u zëvendësuar nga portieri i tretë, 18-vjeçari Aron Jukaj.
Ky i fundit pritet të luajë titullar edhe në sfidën e radhës në kampionat, atë ndaj Skënderbeut në Korçë, teksa trajneri Qatip Osmani shpreson të rikuperojë sa më shpejt Kristi Qarrin, duke qenë se Mëhidri pritet të mungojë më gjatë.
