Një i kërkuar nga autoritetet shqiptare është ekstraduar këtë të enjte në Rinas nga Italia, pas arrestimit në vendin fqinjë.
Ai është Haki Mehmeti, 39 vjeç nga Elbasani.
Mehmeti ishte shpallur në kërkim ndërkombëtar pasi Gjykata e Apelit Vlorë e ka dënuar më 2 Shkurt 2014 me 8 vjet burgim, nga të cilat i kanë mbetur për të vuajtur 6 vjet, 9 muaj e 27 ditë burgim. Ai është shpallur fajtor për veprat penale “Prodhimi dhe shitja e narkotikëve” dhe “Mosbindja ndaj urdhrit të punonjësve të policisë së rendit publik”, të kryera në bashkëpunim.
“Shtetasi Haki Mehmeti nuk iu është bindur urdhrave të punonjësve të Policisë për të ndaluar automjetin me të cilin po transportonte në Berat, në bashkëpunim me shtetasin B.T., një sasi cannabisi, e cila më pas është sekuestruar në cilësinë e provës materiale”, njoftoi policia.
