Në prag të 8 Marsit, një fushatë kundër ngacmimit seksual, me titullin “Unë tregoj”, do të nisë në Bashkinë e Tiranës.
Fushata është krijuar dhe do të zbatohet nga shoqata “Albanian Women in Audiovisual” në bashkëpunim me Ambasadën e Suedisë dhe UNDP në Shqipëri, në kuadër të projektit: “T’i japim fund dhunës ndaj grave dhe vajzave”.
Fushata ka në qendër mesazhe publike, nën sloganin: “Ky qytet nuk hesht, por flet kundër ngacmimit seksual“, të vendosura në pikat kyçe të qytetit, të cilat përfshijnë zona si qendra e qytetit, Rruga e Elbasanit, Tirana e Re, dhe Kombinati.
Ky aktivitet do të mbahet tek monumenti i Miqësisë, Lulishtja përballë Bibliotekës Kombëtare më datën 6 Mars, ora 14:00-15:00.
Të pranishëm në këtë aktivitet do të jenë Zëvëndësministrja e Brendshme, Romina Kuko, Ambasadori i Suedisë në Shqipëri, Niklas Ström, Përfaqësuesja e Përhershme e UNDP-së në Shqipëri, Monica Merino, Kryetari i Shoqatës së Transportit Publik, Z. Dashnor Mema dhe Valbona Sulçe, përfaqësuese e AWA-s.
