Presidenti i Rusisë, Vladimir Putin ka paralajmëruar vendet perëndimore, këtë të enjte, se ekzistonte një rrezik i vërtetë i luftës bërthamore, nëse ato do dërgonin trupat e tyre për të luftuar në Ukrainë dhe ai tha se Moska kishte armët për të goditur objektivat në Perëndim.
Duke iu drejtuar parlamentit dhe anëtarëve të tjerë të elitës së vendit, Putin përsëriti akuzën e tij se Perëndimi është i prirur për të dobësuar Rusinë dhe ai sugjeroi se liderët perëndimorë nuk e kuptonin se sa e rrezikshme mund të ishte ndërhyrja e tyre në atë që ai i cilësoi si punët e brendshme të Rusisë.
Ai e parapriu paralajmërimin e tij me një referencë specifike ndaj një ideje, të paraqitur nga presidenti francez Emmanuel Macron të hënën, për anëtarët evropianë të NATO-s që dërgonin trupa tokësore në Ukrainë – një sugjerim që u refuzua shpejt nga Shtetet e Bashkuara, Gjermania, Britania dhe të tjerët.
“(Kombet perëndimore) duhet të kuptojnë se ne kemi gjithashtu armë që mund të godasin objektivat në territorin e tyre. E gjithë kjo kërcënon vërtet një konflikt me përdorimin e armëve bërthamore dhe shkatërrimin e qytetërimit. A nuk e kuptojnë ata?!” tha Putin, trasnmeton Reuters.
Putin, i cili po fliste përpara zgjedhjeve presidenciale të 15-17 marsit, kur ai është i sigurt se do të rikthehet për një mandat tjetër gjashtëvjeçar, vlerësoi atë që ai tha se ishte arsenali bërthamor jashtëzakonisht i modernizuar i Rusisë, më i madhi në botë.
Lufta në Ukrainë ka shkaktuar krizën më të keqe në marrëdhëniet e Moskës me Perëndimin që nga kriza e raketave Kubane e vitit 1962 dhe Putini ka paralajmëruar më parë për rreziqet e një konfrontimi të drejtpërdrejtë midis NATO-s dhe Rusisë.
I zemëruar dukshëm, Putini, udhëheqësi kryesor i Rusisë për më shumë se dy dekada, u sugjeroi politikanëve perëndimorë të kujtojnë fatin e atyre, si Adolf Hitleri i Gjermanisë naziste dhe Napoleon Bonaparti i Francës, të cilët pushtuan pa sukses vendin e tij në të kaluarën.
“Por tani pasojat do të jenë shumë më tragjike. Ata mendojnë se ajo (lufta) është një karikaturë”, tha Putin.
