46 të burgosur në burgun e Durrësit kanë firmosur një peticion, ku kërkojnë të miratohet Amnistia Penale, e cila ka “ngecur” në Kuvend pasi mazhoranca kërkon që të falen dhe të korruptuarit, por ky nen nuk pranohet nga opozita.
Peticioni i është drejtuar kryeministrit Edi Rama, kryeparlamentares Lindita Nikolla, ministrit të Drejtësisë, Ulsi Manja dhe grupeve parlamentare në Kuvend.
Të burgosurit shprehen se nuk mund të mbahen peng për pazare politike, duke kërkuar që të gjendet gjuha e përbashkët në mënyrë që të lirohen nga burg. Ata e konsiderojnë legjitime kërkesën e tyre, teksa shprehen se iu është premtuar nga qeveria amnistia.
Tek dokumentet e mëposhtme janë dhe emrat e të burgosurve bashkë me firmat e tyre.
Peticioni:
I drejtohemi kryeministrit të Shqipërisë, Edi Rama
Kryetares së Parlamentit, Lindita Nikolla
Ministrit të Drejtësisë, Ulsi Manja
Të gjitha grupeve parlamentare të Parlamentit shqiptar
Ne të burgosurit e burgut të Durrësit që përfitojmë ose jo nga ligji për Amnistinë Penale kërkojmë që siç është premtuar nga qeveria të kemi mundësinë të amnistohemi sa më shpejt.
Për pazare politike ne nuk mund të mbahemi peng. Në çdo kohë ka pasur amnisti ndaj kërkojmë që të gjendet gjuha mes politikës që ne të jemi jashtë në shërbim të familjeve tona.
Të burgosurit kanë një status, nuk ka të majtë dhe të djathtë, jemi një.
Lutemi që inatet politike mos të jenë ngërç për ne.
Duam ti shërbejmë familjeve tona. Kërkojmë të merret në konsideratë kërkesa jonë politike.
